<h3 style="text-align: justify;"><span style="font-size: 18pt;">یانهیا زاخۆ كارهكێ مهزن بۆ بهێزكرنا تیما خوه دكهت، ههڤبهست دگهل هژمارهكا یاریكهرێن ناڤخۆ و پیشهكار گرێدایه، ل ڤێ دووماهییێ ئوفهرهك ب 500 ملیۆن دیناران پێشكێشى یاریكهرهكێ ههلبژارتییێ عیراقێ كرینه.</span></h3> <h3 style="text-align: justify;"><span style="font-size: 18pt;">ژێدهرهكى بۆ ئاژانسا خانى ئاشكراكر، یانهیا زاخۆ ئوفهرهك ب 500 ملیۆن دیناران بۆ ماوێ سالهكێ پێشكێشى یاریكهرێ ههلبژارتییێ عیراقێ ئهمجهد عهتوانى كرینه و نوكه چاڤهرێیى بهرسڤا دووماهییێ یا یاریكهرینه، ئهگهر هات و ئهو ههڤبهسته هاته گرێدان، ئهمجهد عهتوان یێ 26 سالى دێ بیته ئێك ژ بهاترین یاریكهران د دیرۆكا یانهیێدا.</span></h3> <h3 style="text-align: justify;"><span style="font-size: 18pt;">ئهوى ژێدهرى دیاركر، ل ڤێ هاڤینێ زاخۆ ههڤبهست دگهل 14 یاریكهران گرێدایه، هندهك ژ وان پیشهكارن، دنوكهدا كێماسى د هێلا ناڤین و هێلا هێرشبهرییا تیمێدا ههنه، بۆ پركرنا ڤان ڤالاهییان ژى دانوستاندنان دگهل هژمارهكا پیشهكاران دكهن كو حهفت ژ وان بهرازیلینه، دپلانێن یانهیێدایه ههڤبهستێ دگهل یاریكهرهكێ هێلا ناڤین و هێرشبهرهكى ئیمزابكهت.</span></h3> <h3 style="text-align: justify;"><span style="font-size: 18pt;">ل دۆر بهرههڤییێن تیمێ ژى بۆ وهرزێ نوو یێ خۆلا پیشهكارێن عیراقێ ئهوا دێ ل ههیڤا چریا ئێكێ یا بهێت دهستپێكهت دیاركر، ل 26ێ ڤێ ههیڤێ ئانكو ل شهمبییا بهێت ههموو یاریكهر دێ ل زاخۆ كۆمبن و دێ دهست ب بهرههڤییان هێتهكرن، یانه دێ بۆ ماوێ 10 رۆژان ل زاخۆ راهێنانان كهت، دووڤدا دێ كهمپهكێ راهێنانان ل باژێرێ ئهنتالیا یێ توركیا دانیت و بریاره چهند یارییێن ههڤالینى دوى كهمپیدا بكهت، پشتى یانه ژ توركیا ڤهدگهریت دێ چهند یارییێن دى یێن ههڤالی كهت و بهرههڤییێن خوه بۆ وهرزێ بهێت ب دووماهى ئینیت.</span></h3> <h3 style="text-align: justify;"><span style="font-size: 18pt;">ژلایهكێ دیڤه و ل دۆر رهوشا تیما باسكتبۆلێ گوت : یانهیێ ههڤبهستا راهێنهرێ خوه یێ سربى میلان نیسیج بۆ وهرزێ 2023 – 2024 نووكر و دێ بیته وهرزێ وى یێ سێیێ ل دووڤ ئێك دگهل تیمێ، بریاره ل 15 ههیڤا بهێت زاخۆ د یارییا كوپا سوپهرا عیراقێدا دێ ل باژێرێ بهغدا رووبروو یانهیا نهفت ببیت.</span></h3>
