ئێدى وه‌لاتى دشێن ب ترۆمبێلێن خوه‌ گه‌شتێ بۆ ئیرانێ بكه‌ن

ئێدى وه‌لاتییێن هه‌رێما كوردستانێ دشێن بۆ ماوی ئێك سال ب ترۆمبێلێن خوه‌ یێن تایبه‌ت و بارهه‌لگرن و هه‌موو جۆرێن ترۆمبێلێن هاتنوچوونێ گه‌شتێ بۆ كۆمارا ئیسلامییا ئیرانێ بكه‌ن.

ئومێد خۆشناو پارێزگارێ هه‌ولێرێ و نه‌سروللا ره‌شنوودى كونسۆلێ كۆمارا ئیسلامییا ئیرانێ ل هه‌ولێرێ كۆمبوون.

راگه‌هاندنا پاریزگه‌ها هه‌ولێرێ ل دۆر كۆمبوونێ راگه‌هاند، پشتى لێكتێگه‌هشتن و رێككه‌ڤتننامه‌یا دوو سالێن بوورى دناڤبه‌را پارێزگارێ هه‌ولێر و پارێزگارێ ئازه‌ربایجانا رۆژئاڤا ( ورمێ ) دا، كو پێشكه‌ڤتن و به‌ره‌ڤ پێشچوونه‌كا به‌رچاڤ ل بجهئینانا خالێن وێ د زێده‌كرنا لڤینا بازرگانى، ئابوورى و ئاسانكارى بۆ هاتنوچوونا وه‌لاتی و گه‌شتیاران ل خالا سنۆرییا نێڤده‌وله‌تییا حاجى ئومه‌ران – ته‌مه‌رچین بخۆڤه‌ دیت و به‌هرا پتر یا خالێن وان هه‌ردوو رێككه‌ڤتنێ هاتینه‌ بجهئینان، دكۆمبوونا ئه‌ڤرۆ یا دناڤبه‌را ئومێد خۆشناوى و نه‌سروللا ره‌شنوودى دا، خاله‌كا دییا ئه‌وێ رێككه‌ڤتنێ كو ل دووڤ داخوازا پارێزگارێ هه‌ولێرێ بوو ژ پێخه‌مه‌ت خزمه‌تكرنا زێده‌تر یا وه‌لاتییان و ئاسانكارى بۆ گه‌شتكرن و هاتنوچوونێ بۆ كۆمارا ئیسلامییا ئیرانێ ب ترومبێلێن خوه‌ یێن تایبه‌ت دێ چیته‌ بوارێ بجهئینانێدا.

ئاماژه‌ ب هندێ ژى دا، هه‌ردوو لایه‌ن رێككه‌ڤتن وه‌لاتییێن سنۆرێ پارێزگه‌ها هه‌ولێرێ و هه‌رێما كوردستانێ ب رێكا وه‌رگرتنا كارته‌كا تایبه‌ت ده‌فته‌رچه‌ كو ئێك جار مامه‌له‌یا وه‌رگرتنێ دێ پێ هێته‌كرن و ب بهایه‌كێ كێم یێ دیاركرى وێ كارتێ وه‌رگرن، دشێن بۆ ماوێ ساله‌كێ ب ترۆمبێلا خوه‌ یا تایبه‌ت و بارهه‌لگر و هه‌موو جۆره‌ ترۆمبێله‌كا دییا هاتنوچوونێ گه‌شتێ بۆ كۆمارا ئیسلامییا ئیرانێ بكه‌ن.