به‌غدا و هه‌ولێرێ لژنه‌یه‌ك بۆ هاورده‌كرنا ترۆمبێلان پێكئینایه‌

وه‌زاره‌تێن ناڤخۆ یێن عیراقێ و هه‌رێما كوردستانێ لژنه‌یه‌كا هه‌ڤپشك بۆ ئێكخستنا رێنمایێن هاورده‌كرنا ترۆمبێلان ژلایێ گۆمرك و مه‌رجێن سلامه‌تییێڤه‌ پێكئینایه‌، په‌یڤدارێ رێڤه‌به‌رییا گشتییا هاتنوچوونا عیراقێ دبیژیت: دێ راسپارده‌یه‌كێ بۆ سه‌رۆكوه‌زیران بلندكه‌ن و پشتى په‌سه‌ندكرنا وێ، دێ چیته‌ بوارێ بجهئینانیێدا.

عه‌مید قه‌یسى په‌یڤدارێ گشتییێ هاتنوچوونا عیراقێ دیاركر، لژنه‌یه‌كا هه‌ڤپشك دناڤبه‌را هه‌ردوو وه‌زاره‌تێن ناڤخۆ یێن عیراقێ و هه‌رێما كوردستانێدا بۆ ئێكخستنا رێنمایێن هاورده‌كرنا ترۆمبێلان ل هه‌موو ده‌رییێن سنۆرى ل سه‌رانسه‌رى عیراقێ ژلایێ مه‌رجێن سلامه‌تى و شێواز و بهایێ گۆمرككرنا وان ترۆمبێلێن دهێنه‌ هاورده‌كرن، هاتییه‌ پێكئینان.

ئه‌ندامێن لژنه‌یێ ژ رێڤه‌به‌رییا گشتییا هاتنوچوونا عیراقێ، نوونه‌رێ وه‌زاره‌تا ناڤخۆیا هه‌رێما كوردستانێ و رێڤه‌به‌رییێن پۆلیسێن هاتنوچوون و گۆمركێن هه‌رێما كوردستانێ پێكهاتییه‌.

عه‌مید زیاد قه‌یسى گوت : لژنه‌ دێ راسپارده‌یا خوه‌ بۆ سه‌رۆكوه‌زیرێن عیراقێ بلند كه‌ت و پشتى دهێته‌ په‌سه‌ندكرن، دێ كار پێ هێته‌كرن.