د درێژاهییا سهرهدانا خوهدا بۆ دهڤهرا بادینان و كۆمبوونێن دگهل جهماوهرێ وێ، سهرۆك بارزانى ئهڤرۆ 23ێ تهباخا 2023ێ سهرهدانا قهزا شێخان كر و دگهل تهخ و چینێن وێ دهڤهرێ كۆمبوو.
ل دووڤ راگههاندنا بارهگایێ بارزانى، دكۆمبوونا ئهڤرۆ یا قهزا شێخاندا، سهرۆك بارزانى ئارمانجێن سهرهدانا خوه بۆ دهڤهرێ روونكرن و زێدهبارى ئاماژهدان ب پابهندبوونا خهلكێ دهڤهرێ ب فهرههنگا پێكڤهژیانێ، داخواز كر كو رێك نههێتهدان چ كهس و لایهنهكێ خراب و تێكدهر ئهوێ فهرههنگا دهولهمهند كرێت بكهت.
سهرۆك بارزانى ئاماژه ب رهوشا ناڤخۆ یا ههرێما كوردستانێ و پهیوهندییێن ههرێما كوردستانێ دا و راگههاند، دێ ههموو بزاڤان كهت كو رهوشا ناڤخۆ چارهسهر بكهت و ههموو لایهن ل سهر ستراتیجییهتهكا نهتهوهیى و نیشتیمانپهروهرى رێكبكهڤن، ئهوژى دیاركر، حكومهتا نوو یا عیراقێ ل سهر بنهمایێن رێككهڤتنهكا گشتى و بهرچاڤكرنا شهراكهت و تهوازن و تهوافقێ هاته دامهزراندن، لێ ب مخابنیڤه ئهو بنهمایه هاتنه پشتگوهـ خستن، پشتى سهرهدانا شاندێ پارتى بۆ بهغدا، چاڤهرێیه ئهو ئاریشه بهێنه چارهسهركرن.
د درێژاهییا ئاخڤتنا خوهدا سهرۆك بارزانى بهحس ل هندێ كر، پێدڤییه ههرێما كوردستانێ پشتبهستنێ ل سهر شیان و ژێدهرێن خوه بكهت و بۆ وێ مهرهمێ ژى كابینهیا نههێ یا حكومهتا ههرێمێ بهرنامه و پلانێن باش بجهئیناینه و دهرئهنجامێن وێ دیاربوون.
سهرۆك بارزانى د گوتارا خوهدا بهحسا وان مهترسى و ئاستهنگان كر یێن ل بهردهم گهلێ كوردستانێ ههین، داخواز ژى كر، ههموو لایهن پێكڤه د هاریكاربن بۆ كووركرنا ههستێ نیشتیمانپهروهرى و هۆشیاركرنا خهلكى بۆ رووبرووبوونا ئهوان كاران یێن پاشهرۆژا كۆمهلگههێ و گهنجان دكهنه ئارمانج.
