سوودانى داخوازێ ژ توركیا دكه‌ت ئاڤا زێده‌تر به‌رده‌ته‌ ناڤا ڕووبارێ فۆرات

سه‌رۆكوه‌زیران محه‌مه‌د شیاع سوودانى ئه‌ڤرۆ دگه‌ل هاكان فیدان وه‌زیرێ ده‌رڤه‌ یێ توركیا و شاندێ دگه‌لدا كۆمبوو.

دكۆمبوونا واندا به‌حسا په‌یوه‌ندییێن دوو قۆلییێن دناڤبه‌را هه‌ردوو وه‌لاتاندا و چه‌وانییا ب هێزكرنا هاریكارییێن هه‌ڤپشك ل سه‌ر ئاستێن جۆره‌وجۆر هاته‌ كرن، دانوستاندن ل سه‌ر بهێزكرنا هه‌ڤپشكییا ئابوورى و بزاڤێن به‌رهنگاربوونا تیرۆرێ دناڤبه‌را هه‌ردوو وه‌لاتاندا هاتنه‌ كرن.

سوودانى دووپاتى ل هندێ كر، عیراق ل سه‌ر چاره‌سه‌ركرنا هه‌موو كه‌یسان ب رۆحییه‌ته‌كا هاریكارى و جیرانییه‌كا باش یا رژده‌، ژبلى به‌رده‌ستبوونا ده‌رفه‌تا زێده‌تر یا پێدانا سۆز و هه‌ماهه‌نگییا ئابوورى و بازرگانییێ.

هه‌ر دوێ دیدارێدا سوودانى ئاماژه‌ ب پێدڤییا هه‌ماهه‌نگییا دناڤبه‌را عیراق و توركیا دا كر، ب تایبه‌تى د وان هه‌لویستاندا یێن خزمه‌تێ ب به‌رژه‌وه‌ندییێن هه‌ردوو گه‌لێن عیراقێ و توركیا دا دكه‌ن، په‌سنا ده‌ستپێشخه‌رییا ڤێ دووماهییێ یا توركیا بۆ به‌ردانا ئاڤا ڕووبارێ دیجله‌ كر، داخواز ژ لایه‌نێ توركیا كر كو ئاڤا زێده‌تر بۆ ڕووبارێ فورات ژى به‌رده‌ت، ب تایبه‌تى د نوكه‌دا كو ملیۆنان زیاره‌تكاران سه‌ره‌دانا عیراقێ دكه‌ن.

سه‌رۆكوه‌زیرێن عیراقێ به‌حس ل هندێ ژى كر، ئه‌و ل سه‌ر پێكئینانا لژنه‌یه‌كا هه‌رده‌مى دناڤبه‌را هه‌ردوو وه‌لاتاندا بۆ چاره‌سه‌ركرنا كه‌یسا ئاڤێ رێككه‌ڤتن.