شرۆڤەکارەک: ھەرێما كوردستانێ و تورکیا بەرژەوەندی یێن ھەڤپشك ھەنە

ئاژانسا خانی” تایبەت:

شرۆڤەکارەکێ سیاسی ئاشکرا کر، سەرەدانا وەزیرێ دەرڤەیێ تورکیا بۆ عێراق و ھەرێما کوردستانێ لدۆر چەند پرسێن گرنگە و دبێژیت، ھەرێما کوردستانێ و تورکیا بەرژەوەندیێن ھەڤپشك ھەنە و دێ چەندین پرس ھێنە بەحسکرن.

د. ئاراس عەبدوللا” شرۆڤەکاره‌كێ سیاسییه‌ بۆ ئاژانسا خانی دیار کر” سەرەدانا ھاکان فیدانی وەزیرێ دەرڤەیێ تورکیا بۆ عێراقێ و ھەرێما کوردستانێ لدۆر چەند پرسێن گرنگە ژوان ژی پرسا ئاساییشا تورکیا و بابەتێ ئاڤێ و ڤەکرنا رێیه‌كا بازرگانی دناڤبەرا عێراقێ و تورکیا، پەیوەندی یێن بازرگانی یێن ھەرێما کوردستانێ ل گەل تورکیا د ئاستەکێ باش دانه‌، بەلێ تورکیا دخوازیت ل پارێزگەھێن دی یێن عێراقێ ژی وەبەرھێنەرێن تورکیا کار بکەن، ژلایەکێ دیڤە وەزیرێ دەرڤەیێ تورکیا دێ رێکێ خۆش کەت بۆ سەرەدانا سەرۆکێ تورکیا، چونکە بڕیارە سەرۆک کۆمارێ تورکیا سەرەدانا ھژمارەک وەلاتێن دەڤەرێ بکەت و ژوان ژی سەرۆک کۆمارێ تورکیا دێ سەرەدانا عێراقێ کەت.

ناڤهاتی گۆت ژی” ھەموو ژێدەرێن ئاڤا عێراقێ ل تورکیا دھێن ئەڤە ژی بوویە ئەگەر تورکیا ئاڤێ وەکی کارتەک ھەمبەری عێراقێ بکار بینیت، ھەر چەندە رێکكەفتنێن نێڤدەولەتی ھاتینە کرن بۆ پرسا ئاڤێ، بەلێ تورکیا ل ھەمبەر کەرتێ نەفتێ کەرتێ ئاڤێ بکار دئینیت.

د. ئاراس عەبدوللا دبێژیت ژی” چەند مژارەک دێ دناڤبەرا وەزیرێ دەرڤەیێ تورکیا و بەرپرسێن ھەرێما کوردستانێ ھێنە بەحسکرن، ژوان ژی پرسا ھەبوونا چەکدارێن پەکەکێ، چونکی لدووڤ ده‌ستووری پەکەکە نەشێت وەکی چەکدار دناڤا خاکا ھەرێما کوردستانێ بمینیت، ب تنێ وەکی پەناھەندە ل عێراق و ھەرێما کوردسانێ دشێت جھگیر ببیت، هه‌روه‌سا تورکیا و ھەرێما کوردستانێ بەرژەوەندی یێن ھەڤپشك ھەنە و بابەتێ ھنارتنا نەفتێ ژی دێ ئێک ژوان بابەتێن گرنگ بیت یێن دھێنە بەحسکرن.