جهێ دلگرانیێ یه‌ تا نوكه‌ مادده‌یێ 132 یێ ده‌ستوورێ ئیراقێ نه‌هاتیه‌ بجهئیان

مه‌سرور بارزانى، سه‌رۆكێ حكومه‌تا هه‌رێما كوردستانێ د سالڤه‌گه‌را ئه‌نفالێن به‌هدینان دا داخواز ژ حكومه‌تا ئیراقێ كر قوربانیان قه‌ره‌بوو بكه‌ت. 
مه‌سرور بارزانى، سه‌رۆكێ حكومه‌تا هه‌رێما كوردستانێ ئه‌ڤرۆ ئه‌ینیێ 25-8-2023یێ په‌یامه‌ك د سالڤه‌گه‌را ئه‌نفالێن به‌هدینان دا به‌لاڤكر و داخوازكر، زیانڤێكه‌فتیێن ئه‌نفالان بهێنه‌ قه‌ره‌بووكرن.
مه‌سرور بارزانى دبێژیت: د 35مین سالڤه‌گه‌ڕا پێلا ئه‌نفالان دا ل ده‌ڤه‌را به‌هدینان ب رێز یادا قوربانیێن وێ تاوانا مه‌زن و هۆڤایه‌تیا رژێما پێشتر یا ئیراقێ دكه‌ین كو ئارمانج ژێ قڕكرن و جینۆسایدكرنا گه‌لێ كوردستانێ بوو ب هه‌مى پێكهاتێن خۆ ڤه‌.
هه‌روه‌سا دیاركر، د ڤێ هێرشێ دا كو دوماهى قۆناغێن پێلا ئه‌نفالان بوون ب هزاران خه‌لكێ بێتاوانێن به‌هدینان هاتنه‌ ئه‌نفالكرن و ب ده‌هان هزار ژى ئاواره‌ ده‌ربه‌ده‌ربوون و سه‌دان گوند هاتنه‌ تێكدان و ژ ئه‌نجامێ بكارئینانا چه‌كێ قه‌ده‌غه‌كرى زیانه‌كا مه‌زن ب ناوچێ كه‌فت.
مه‌سرور بارزانى هه‌ر د په‌یاما خۆ دا دبێژیت: جهێ دلگرانیێ یه‌ تا نوكه‌ مادده‌یێ 132 یێ ده‌ستوورێ ئیراقێ نه‌هاتیه‌ بجهئیان كو تایبه‌ته‌ ب قه‌ره‌بووكرنا زیانڤێكه‌فتى و كه‌سوكارێن قوربانیێن پێلا ئه‌نفالان و تاوانێن رژێما به‌عسا ئیراقێ.
هه‌ر د ڤێ یادێ دا دوپات دكه‌ت، كو مافێن ره‌وایێن خه‌لكێ كوردستانێ ب تایبه‌ت ژى كه‌سوكار و زیانڤێكه‌فتیێن ده‌ستێ رژێما پێشتر یا ئیراقێ ب شێوه‌یه‌كێ هه‌ژى بهێنه‌ دان و بهێنه‌ قه‌ره‌بووكرن و پشت راستى پێ بهێته‌ دان جاره‌كا دى رووبڕووى جینۆسایدكرنێ نه‌بنه‌ ڤه‌.
ل دوماهیا په‌یاما خۆ سه‌رۆكێ حكومه‌تێ دبێژیت: سه‌رێ رێزێ بۆ گیانێ پاقژێ ئه‌نفالكریێن به‌هدینان و هه‌موو شه‌هید و ئه‌نفالكریێن كوردستانێ د چه‌مینین.