ئاژانسا خانی:
د. سلێمان ته‌مه‌ر” سه‌رۆكێ رێكخراوا كوردستان بۆ پاراستنا مافێن ئاژه‌لان” بۆ ئاژانسا خانی گۆت” گۆپیتكا حه‌فتێ یا كۆربه‌ندێ ژینگه‌ها جیهانی ل باژێرێ ڤانكۆڤه‌ر ل وه‌لاتێ كه‌نه‌دا هاته به‌ستن و بۆ ده‌مێ چار رۆژان یا به‌رده‌وام بوو” وی وه‌كو نۆشداره‌كێ كورد ب نوونه‌راتییا هه‌رێما كوردستانێ و عیراقێ پشكداری د وی كۆربه‌ندی دا كرییه” د وی كۆنفرانسی دا هزار و 500 كه‌سان” ژ 185 وه‌لاتان ل سه‌رانسه‌ری جیهانێ پشكداری تێدا كربوو” هه‌روه‌سا وه‌زیرێن ژینگه‌هێ و وه‌زێرێن ناڤخۆ و ده‌رڤه یێن چه‌ندین وه‌لاتێن جیهانی و پرانییا و ته‌خ و چینێن جیهانی ژی پشكداری تێدا كربوو” هه‌روه‌سا جه‌ستن ترۆدۆ سه‌رۆك وه‌زیرێن كه‌نه‌دا ژی پشكداری تێدا كر و په‌یڤه‌ك د وی كۆربه‌ندی دا پێشكێش كر و هه‌روه‌سا كه‌نه‌دا 200 ملیۆن دۆلار بۆ پاراستنا ژینگه‌هێ ته‌رخان كرن و چه‌ندین وه‌لاتێن دیتر ژی پاره بۆ پاراستنا ژینگه‌هێ ته‌رخان كرن” چه‌ندین په‌یڤێن دیتر ژ لایێ وه‌زیر و كه‌سانێن تایبه‌تمه‌ند د بیاڤێ ژینگه‌هێ دا هاتنه خواندن و ئه‌و خالێن د وی كۆنفراسی دا هاتینه دیار كرن” دێ بۆ هه‌موو وه‌لاتان هێنه هنارتن” داكو مفایی ژ وان خالان ببینن و ب رژدی كار ل سه‌ر وان خال و پیشنیاران بهێته كرن” ژ بۆ په‌یداكرنا ژینگه‌هه‌كا ساخله‌م.
ناڤهاتی گۆت ژی: د وی كۆربه‌ندی دا ته‌كه‌زی ل سه‌ر سێ خالان هاته كرن” كو ئه‌و ژی گه‌نج چاوا دێ ژینگه‌هێ پارێزن و ژن چاوا دێ شێن ژینگه‌هێ پارێزن” هه‌روه‌سا چاوا خه‌لك ل گوندان و ل زۆزانا ل گه‌ل سرووشتی دژین” ئه‌ڤ خاله گه‌له‌ك ب درێژی هاتنه به‌حس كرن” چونكی جیهانگیرییێ زیانێن مه‌زن گه‌هاندینه جیهانێ و دڤێت ئێدی ئه‌م سرووشتی و ژینگه‌ها خۆ بپارێزین” هه‌روه‌سا ئه‌م نێزیكی 100 كه‌سان ژ رێكخراوێن جیهانی د ی كۆربه‌ندی دا پشكدار بووین و ئه‌م سێ كه‌س ژ كیشوه‌رێ ئاسییا بووین” هه‌روه‌سا من ژی ب دو خالان پشكداری د وی كۆربه‌ندی دا كر” ئه‌و ژی نێچیرا ئاژه‌لان و برینا داران” ل گه‌ل هندێ ژی من به‌حسێ برینا ئاڤێ ژ لایێ توركیا و تۆپ بارانكرنا به‌رده‌وام یا توركیا بۆ سه‌ر ژینگه‌ها كوردستانێ كر” كو زیانێن مه‌زن دگه‌هنه ژینگه‌ها كوردستانێ” دیسان د وی كۆربه‌ندی دا چه‌ندین روونشتن هاتنه ئه‌نجامدان.
