كه‌رتێ خانووبه‌ران دێ بیته‌ ئه‌لكترۆنى

رێڤه‌به‌رێ گشتییێ خانووبه‌ران راگه‌هاند كار بۆ ئه‌لكترۆنیكرنا كه‌رتێ خانووبه‌ران ل هه‌رێما كوردستانێ یێ به‌رده‌وامه‌ و ب دیتنا وى ژبلى ڤه‌گه‌راندنا ده‌مى، كه‌یسێن خانووبه‌ران دێ ب شێوه‌یه‌كێ دروستتر هێنه‌ هه‌لگرتن، هه‌روه‌سا دێ ژده‌ستكاری و سه‌خته‌كارییان هێنه‌ پاراستن.

د. لوقمان عومه‌ر رێڤه‌به‌رێ گشتییێ تۆماركرنا خانووبه‌ران ل هه‌رێما كوردستانێ راگه‌هاند، بزاڤێن حكومه‌تێ بۆ ئه‌لكترۆنیكرن و دیجیتالكرنا كه‌رتێ خانووبه‌ران د به‌رده‌وامن، ئه‌و سیسته‌مه‌ پێدڤى ب چه‌ند سالایه‌ لێ كار و پێنگاڤان ده‌ستپێكرییه‌.

دكتۆر لوقمان عومه‌ر وه‌سا دبینیت ئه‌و سیسته‌مه‌ گه‌له‌ك یێ باشه‌، ئه‌و كه‌رته‌ دێ ژ دزی و سه‌خته‌كارى و ده‌ستكاریكرنان پتر یێ پاراستى بیت.

سه‌باره‌ت ده‌مێ كاركرنێ ب سیسته‌مێ نوو، رێڤه‌به‌رێ گشتییێ تۆماركرنا خانووبه‌ران ئاماژه‌ ب هندێ دا، ئێك مامه‌له‌یا تۆمارا خانوویان ژ 400 مامه‌له‌یان پێك دهێت، هه‌موو زانیارى تێدانه‌، ب ئه‌لكترۆنیكرنا وان كاران دێ پێدڤى ب ده‌مه‌كێ درێژ بیت، دڤێت هه‌موو زانیارى ژلایێ فه‌رمانبه‌رێ راهێنان پێكریڤه‌ بهێنه‌ تۆماركرن و ئه‌وژى پێدڤى ب ده‌مییه‌.

رێڤه‌به‌رێ گشتییێ تۆماركرنا خانووبه‌ران گوت : هه‌موو كارێن كرین و فرۆتنا خانووبه‌ران، تۆماركرن گوهۆرین وهه‌موو مامه‌له‌ هه‌تا دووماهییێ دێ ب رێكا ئه‌وى سیسته‌مى بن، له‌وما پشتى تمامبوونێ، ئاسانكارییێن زێده‌تر بۆ فه‌رمانبه‌ران دێ به‌رده‌ست بن و بۆ وه‌لاتییان ژى دێ بیته‌ ئه‌گه‌ره‌ك بۆ كێمكرنا رۆتینێ.

رێڤه‌به‌رێ گشتییێ تۆماركرنا خانووبه‌ران ل هه‌رێما كوردستانێ به‌حس ل هندێ كر، سه‌ربارى په‌یره‌وكرنا سیسته‌مێ ئه‌لكترۆنییێ كه‌رتى، ده‌سبه‌ردارى شێوازێ په‌یره‌وكرییێ نوكه‌ نابن، هه‌ردوو سیسته‌م دێ هێنه‌ په‌یره‌وكرن.