سه‌رۆكێ ده‌سته‌یا ده‌ستپاكییا هه‌رێما كوردستانێ دیاركر، برگه‌یه‌كا قانوونا چاكسازییا هه‌رێما كوردستانێ دێ چیته دبوارێ بجهئینانێدا كو هه‌ر كه‌سه‌كێ ب پله‌یا وه‌زیر هاتبیته خانه‌نشینكرن و ئه‌و پله نه‌بیت، دێ ڤه‌گه‌ریته پله‌یا خوه یا دروست و دبێژیت : كێمكرنا مووچه‌یێ خانه‌نشینییا وه‌زیر و په‌رله‌مانتاران بۆ 50%ێ ل دووڤ قانوونێ كه‌ڤتییه دبوارێ بجهئینانێدا.
حاكم ئه‌حمه‌د ئه‌نوه‌ر سه‌رۆكێ ده‌سته‌یا ده‌ستپاكییا هه‌رێما كوردستانێ دیاركر، وان دووڤچوونا برگه‌یه‌كا چاكسازییێ ل هه‌رێما كوردستانێ كرییه كو كارێن وان تمام بووینه و فایلا وێ جڤاتا وه‌زیرانه، ئه‌وژى یا تایبه‌ته ب وان كه‌سێن ب پله‌یا وه‌زیر هاتینه خانه‌نشینكرن و نه‌گه‌هشتبنه وێ پله‌یێ.
سه‌رۆكێ ده‌سته‌یا ده‌ستپاكییێ دبێژیت: ل هه‌رێما كوردستانێ هه‌نه ب پله‌یا وه‌زیر خانه‌نشین بووینه و وه‌زیر نه‌بووینه، ئه‌و خانه‌نشینه دێ بۆ پله‌یا وى یا دروست هێته ڤه‌گۆهاستن و دێ ل دووڤ وێ پله‌یێ هێته خانه‌نشینكرن، ب تنێ بریارا جڤاتا وه‌زیران مایه و دێ كه‌ڤیته دبوارێ بجهئینانێدا.
حاكم ئه‌حمه‌د ئه‌نوه‌ر ئاماژه ب هندێ ژى كر، برگه‌یه‌كا قانوونا چاكسازییێ كه‌ڤتییه دجهئینانێدا كو تایبه‌ته ب پله‌یا خانه‌نشینییا پله‌یێن بلند كو مووچه‌یێ وان ژ 80%ێ بۆ 50% بۆ 60%ێ كێمكرییه.
سه‌رۆكێ ده‌سته‌یا ده‌ستپاكییێ ئاشكراكر ل دووڤ قانوونا چاكسازییێ، مووچه‌یێ خانه‌نشینییا وه‌زیر و په‌رله‌مانتاران كو پێشتر 80%ێ یا سه‌رجه‌مێ مووچه‌یێ وان بوو، بۆ 50%ێ هاته كێمكرن، حاكم ئه‌حمه‌دى گوت ژى : ل دووڤ قانوونا چاكسازییێ مووچه‌ییێ خانه‌نشینییا رێڤه‌به‌رێن گشتى و بریكارێن وه‌زیران ژ 80%ێ بۆ 60%ێ دێ هێته كێمكرن.
