ب مەرەما ئاشنابوونێ ل سەر کەتوار و ئاستێ زانکۆیا دهۆک گەهشتیێ و هەڤکاری و هەماهەنگیا زێدەتر، دیسان ئاڤاکرنا پەیوەندیا و بجهئینانا پرۆژێن هەڤپشک، ئەڤرۆ رێکەڤتی ٣١ـی تەباخێ، ل سەنتەرێ رەوشەنبیری و جڤاكیێ زانکۆیا دهۆک، شاندەکێ پەرلەمانتارێن وەلاتێ کەنەدا، ب سەرۆکاتیا پەرلەمانتارێ کەنەدی و سەرۆکێ کۆمەلا کوردی ل پەرلەمانتارێ کەنەدا، تۆم کمیچ، سەرەدانا زانکۆیا دهۆک كر و ژ لایێ د. داود سلێمان ئەتروشی، سەرۆکێ زانکۆیا دهۆک و هژمارەکا ستافێ زانکۆیا دهۆک ڤە هاتە پێشوازیکرن.
د رینشتنەکێ دا و ب ئامادەبوونا د. رەند حەمۆدی، رێڤەبەرا نڤیسینگەها پەیوەندیێن ناڤدەولەتی ل زانکۆیا دهۆک، د. داود ئەتروشی، زانکۆیا دهۆک بۆ شاندێ مێڤان دا نیاسین و باس ل ئاستێ بلندێ زانکۆیا دهۆک گەهشتیێ کر، ب تایبەتی ژی ژ لایێ پەیوەندیێن ناڤدەولەتی ڤە، کو زانکۆیا دهۆک د نوکە دا ٢٢ پرۆژێن هەڤپشک ل گەل سازیێن جودایێن ناڤدەولەتی هەنە. دیسان شانازیا خۆ دەربری كو “زانکۆیا دهۆک ئێکە ژ باشترین زانکۆیێن هەرێما کوردستانێ و عیراقێ ژ لایێ پەیوەندیێن ناڤدەولەتی ڤە”.
هەر د روینشتنێ دا، سەرۆکێ شاندێ پەرلەمانتارێن وەلاتێ کەنەدا سەرسامیا خۆ ب ئاستێ پێشکەڤتیێ زانکۆیا دهۆک گەهشتیێ دەربری و بەرهەڤیا خۆ بۆ دروستکرنا پەیوەندیێن بهێزتر و پتر گرنگیدانێ ب پرۆژێن هەڤپشک دیاركر. ژ لایەکێ دی ڤە باس ل ئەزموونا فیدرالیا وەلاتێ کەنەدا کر. ژ لایێ خۆ ڤە، سەرۆکێ زانکۆیا دهۆک هەبوونا پرۆژێن هەڤپشکێن پاشەرۆژی ل گەل زانکۆ و سازیێن وەلاتێ کەنەدا ب گرنگ سالۆخدا و دیارکر، کو زانکۆیا دهۆک پلان هەنە پرۆژێن جودا د ڤی بواری دا هەبن.
هەر د ڤێ روینشتنێ دا، کاروان زێباری، رێڤەبەرێ سیاسەت و داکۆکیکرنێ ل نوینەراتیا حکومەتا هەرێما کوردستانێ ل ویلایەتێن ئێکگرتی یێن ئەمریکا، باس ل رۆلێ مەزنێ پارێزگەها دهۆک و زانکۆیا دهۆک د پشتەڤانیا پەنابەر و ئاوارەیان دا کر و ئەو یەکە ژی دیارکر، کو ژبەرکو پارێزگەها دهۆک نێزیکی مووسل و وەلاتێ سووریایە، ئاوارە و پەنابەر ژ دەڤەرێن جودایێن عیراقێ و سووریێ بەرەڤ پارێزگەها دهۆک هاتن و لێ ئاکنجیبوون. زانکۆیا دهۆک رۆلەکێ مەزن د چاڤدێری و پشتەڤانیا وان دا گێرا، کو هژمارەکا زۆرا پرۆژێن خۆ کرنە د خزمەتا وان دا و دەلیڤەیێن خواندنێ بۆ هژمارەکا زۆرا پەنابەر و ئاوارەیان دابین کرن و تا نوکە ژی ل سەر ڤێ یەکێ يا بەردەوامە. ل دويماهيێ ژی دەستخۆشیێن خۆ ژی ئاراستەی زانکۆیا دهۆک کرن.
