رێڤه‌به‌رێ گشتییێ ئاڤ و ئاڤرێژان ل وه‌زاره‌تا باژێرڤانى و گه‌شتوگوزارێ ل حكومه‌تا هه‌رێما كوردستانێ راگه‌هاند، ئه‌و دێ ب رێكا بجهئینانا چه‌ند پرۆژه‌یێن ستراتیجى، بكارئینانا ئاڤا ڤه‌خوارنێ یا بیران كێمكه‌ن.
ئارى ئه‌حمه‌د رێڤه‌به‌رێ گشتییێ ئاڤ و ئاڤرێژان ل وه‌زاره‌تا باژێرڤانى و گه‌شتوگوزارێ ل حكومه‌تا هه‌رێما كوردستانێ دیاركر، ئه‌و نوكه بۆ دابینكرنا ئاڤا ڤه‌خوارنێ 50%ێ پشتبه‌ستنێ ل سه‌ر ئاڤا ل سه‌ر ئه‌ردى دكه‌ن، 50%ێ ژى پشتبه‌ستنێ ل ئاڤا بیران دكه‌ن، د ده‌مه‌كیدا هه‌رێمێ ئاڤه‌كا مه‌زن ل سه‌ر ئه‌ردى هه‌یه و دشیاندایه ب رێكا پرۆژه‌یێن ستراتیجى ب تمامى ئاڤا ڤه‌خوارنێ پێ دابین بكه‌ن.
گوت ژى : ئاڤا ل ژێر ئه‌ردى و بیران یه‌ده‌كن، وان دڤێت بۆ نڤشێن داهاتى و ده‌مێن گه‌له‌ك پێدڤى هه‌لبگرن، ل شوونا وێ ئاڤا ل سه‌ر ئه‌ردى بكاربینن، بۆ ڤێ مه‌ره‌مێ ژى ژماره‌یه‌كا پرۆژه‌یێن ستراتیجى ئێخستینه دپلانێدا ژ وان، ( ئاڤا دووكان سێ، پرۆژه‌ێ ئاڤا هه‌ولێرێ، ئاڤا سۆران دوو، به‌رده‌ره‌ش، خه‌لیفان و هه‌ریر و چه‌مچه‌مال ) كو پشتى دابینكرنا بودجه‌ى دێ چنه دبوارێ بجهئینانێدا.
به‌حس ل هندێ ژى كر، ب رێكا بجهئینانا وان پرۆژه‌یان، مفاوه‌رگرتن و پشتبه‌ستن ل سه‌ر ئاڤا ل سه‌ر ئه‌ردى دێ گه‌هیته نێزیكى 80%ێ، ب ڤێ چه‌ندێ ژى نیڤا وان بیرێن نوكه مفا ژێ دهێته وه‌رگرتن، دێ هێنه گرتن.
