وه‌زاره‌تا خواندنا بلند و ڤه‌كۆلينێن زانستى یا حكومه‌تا هه‌رێما كوردستانێ راگه‌هاند كو هه‌ر سێ ده‌رچوویێن ئێكێ و هه‌لگرێن باوه‌رنامه‌یێن بلند ل زانكۆیێن هه‌رێما كوردستانێ یێن ل ده‌ڤه‌رێن ده‌رڤه‌ى ئیداره‌یا هه‌رێمێ د ئاكنجى دشێن داخوازیا دامه‌زراندنێ ل سه‌ر میلاكێ حكومه‌تا ئیراقێ پێشكێش بكه‌ن.
وه‌زاره‌تا خواندنا بلند دیاركریه؛ پرۆسێسا وردبینیێ ل دوسیه‌یا سێ ئێكه‌مێن زانكۆیێن هه‌رێمێ و هه‌لگرێن باوه‌رنامه‌یێن بلند ل زانكۆیێن هه‌رێمێ كو ئاكنجیێن ده‌ڤه‌رێن ده‌رڤه‌ى هه‌رێمێ نه ب مه‌به‌ستا دامه‌زراندنا وان ده‌ستپێكریه.
هه‌روه‌سا ئاگه‌هداریا هه‌مى سێ ئێكه‌مان و هه‌لگرێن باوه‌رنامه‌یێن بلند ل زانكۆیێن هه‌رێمێ یێن ل ده‌ڤه‌رێن ده‌رڤه‌ى ئیداره‌یا هه‌رێمێ د ئاكنجى كریه كو یاسایێن ژماره 59 و 67 ژ وان دگرن ژ بۆ دامه‌زراندنێ ل سه‌ر میلاكێ حكومه‌تا ئیراقێ، پێدڤیه سه‌ره‌دانا ڤى لینكى confirm.iraqi-fpsc.gov.iq بكه‌ن ژ بۆ وردبینیكرنێ هه‌روه‌سا پشتراستبوونێ ژ راستى و دروستیا وان داتایێن د فۆرمێن وان دا هه‌ین.
دیار ژى كریه: ئه‌و لینكه دێ تا رۆژا سێشه‌مبیێ ده‌مژمێر 12ى شه‌ڤ بۆ ده‌رچوویان كارا بیت.
زێده ژى كریه: ئه‌گه‌ر هه‌ر ده‌رچوویه‌كێ كێشه د داتایان دا هه‌بیت و نه‌شێت چاره‌سه‌ر بكه‌ت، دشێت ب رێكا ئیمه‌یلێ وه‌زاره‌تێ gdaf.office@mhe-krg.org وێنه‌یه‌كێ ژ داتایێن خۆ بهنێریت و شاشیان ده‌ستنیشان بكه‌ت ژ بۆ راستڤه‌كرنێ.
هه‌روه‌سا وه‌زاره‌تێ داخواز ژ وان ده‌رچوویان كریه یێن داتایێن وان د دروست كو پێدڤیه داتایێن خۆ د فۆرما ئه‌له‌كترۆنى دا داتا بكه‌ن و په‌سه‌ند بكه‌ن و بهنێرن دا كو ژ دامه‌زراندنێ بێبه‌ش نه‌بن.
