رێڤه‌به‌رێ ئاهێن خوارنێ ل دهۆكێ راگه‌هاند، به‌رى دوو رۆژان ده‌ست ب به‌لاڤكرنا پشكا هه‌یڤا ته‌باخێ یا خوارنێ هاتییه كرن و ل تماما سه‌نته‌رێ باژێرێ دهۆكێ هاتییه به‌لاڤكرن.
نیهاد حسێن رێڤه‌به‌رێ ئاهێن خوارنێ بۆ ئاژانسا خانى دیاركر، به‌رى دوو رۆژان ل سه‌رانسه‌رى عیراقێ ده‌ست ب به‌لاڤكرنا پشكا هه‌یڤا ته‌باخێ یا خوارنێ هاتییه كرن، ل تماما سه‌نته‌رێ باژێرێ دهۆكێ، قه‌زا سێمێلێ و ئیداره‌یا سه‌ربه‌خۆ یا زاخۆ پشكا خوارنێ ب سه‌ر وه‌لاتییاندا هاتییه به‌لاڤكرن، ب تنێ هنده‌ك ده‌ڤه‌رێن ده‌وروبه‌رێن پارێزگه‌هێ وه‌كو سه‌رنگ و ده‌ڤه‌رێن دى ماینه و هه‌تا دووماهییا ڤێ هه‌یڤێ پشكا خوارنێ یا هه‌یڤا ته‌باخێ دێ گه‌هیته هه‌موو ده‌ڤه‌ران.
ژلایه‌كێ دیڤه ئه‌سیر غوره‌یێرى وه‌زیرێ بازرگانییا عیراقێ راگه‌هاند، رێژه‌كا مه‌زن یا مادده‌یێن پشكا خوارنا هه‌یڤانه گه‌هشتییه، دێ پێدڤییێن خورانێ عه‌مباركه‌ن و ئه‌وا پێدڤى ژى بیت دێ ب بریكاران هێته دان.
هه‌روه‌سا نه‌وازد شێخ كامل رێڤه‌به‌رێ گشتییێ بازرگانى ل وه‌زاره‌تا بازرگانى و پیشه‌سازییێ ل حكومه‌تا هه‌رێما كوردستانێ راگه‌هاند، ئه‌و پشكا خوارنێ یا وه‌زاره‌تا بازرگانییا عیراقێ وه‌ردگریت، پشكا هه‌رێما كوردستانێ ژى دگه‌لدایه و دێ ب سه‌ر وه‌لاتییاندا هێته به‌لاڤكرن.
