نێچیرڤان بارزانى : ئه‌ڤ كاره‌ساته‌ یا مه‌یه‌ و ب دل و جان دگه‌ل وانین

دچارچووڤێ سه‌ره‌دانا خۆدا بۆ نه‌خۆشخانه‌یا ئیمه‌رجه‌نسى یا باژێری هه‌ولێرێ و پرسیاركرنا ره‌وشا بریندارێن ڕوودانێ، نیچیرڤان بارزانى سه‌رۆكێ هه‌رێما كوردستانێ راگه‌هاند، ڕوودانا حه‌مدانییه‌ كاره‌ساته‌كا مه‌زنا مرۆڤی بوو، ئه‌و ده‌ستخۆشییێ ل وه‌زاره‌تا ساخله‌مییا حكومه‌تا هه‌رێما كوردستانێ و پارێزگارێ هه‌ولێرێ دكه‌ت، كو ژ ده‌ستپێكێ و ده‌مژمێرێن ئێكێ یێن ڕوودانا وێ كاره‌ساتێ، ئه‌مبۆلانس هنارتن.

نێچیرڤان بارزانى راگه‌هاند ژى، وى دڤێت پر ژ دل ده‌ستخۆشی و سوپاسییا كارمه‌ندێن ساخله‌مییێ بكه‌ت، ئه‌وى ب چاڤێن خوه‌ دیت كو ئه‌و چاڤدێرییا بۆ نه‌خۆشان دهێته‌كرن، جهێ شانازییێ یه‌ بۆ هه‌موو خه‌لكێ هه‌رێما كوردستانێ.

سه‌رۆكێ هه‌رێمێ ئه‌وژى دیاركر، ئه‌ڤه‌ كاره‌ساته‌كا مه‌زنا مرۆڤییه‌، دڤێت هه‌موو دگه‌ل وان خووشك و برایان ب راوه‌ستن، به‌لكو خۆدایێ مه‌زن بهێنفره‌هییێ بده‌ت.

روون ژى كر، هه‌ر دڤى چارچووڤه‌یدا ئه‌ڤرۆ دگه‌ل سه‌رۆكوه‌زیرێن عیراقێ ئاخفت، جه‌نابێ وان گه‌له‌ك گرنگییێ ب ڕوودانێ دده‌ن، هه‌ر زوو وه‌زیرێ ناڤخۆ بۆ باژێرێ مووسل هنارت و وه‌زیرێ ساخله‌مییێ ره‌وانه‌ى هه‌رێما كوردستانێ كر، وى داخواز كر لیكۆلینه‌كا جددى دڤى بابه‌تیدا بهێته‌كرن، دڤێت ئه‌و قوربانییێن هه‌ین بهێنه‌ قه‌ره‌بووكرن.

گوت ژى : ب سوپاسیڤه‌ سه‌رۆكوه‌زیران ل به‌غدا گرنگییێ ب وى بابه‌تى دده‌ت، سۆزدایه‌ دكۆمبوونا جڤاتا وه‌زیراندا به‌حسا هندێ بكه‌ت، دێ هه‌موو تشتان كه‌ت بۆ هندێ ئازارێن ئه‌ڤى خه‌لكى كێم بكه‌ت.

دووپات ژى كر، ئه‌ڤ كاره‌ساته‌، ب راستى كاره‌ساته‌كا مه‌زنا مرۆڤییه‌، ئه‌و هه‌موو دێ دووعا كه‌ن بۆ هندێ نه‌خۆش ب زووترین ده‌م ساخ بن.

زێده‌تر ئاشكراكر، ئه‌وا وى ژ كادرێن ساخله‌مییێ گۆلیبووى، دشێن ل ڤێرێ هه‌موویان چاره‌سه‌ر بكه‌ن، دیسان سوپاسییه‌كا گه‌رم ل وان تیمان دكه‌ت و ده‌ستخۆشییێ لێ دكه‌ت بۆ ڤى كارێ مرۆڤى یێ كرى، سوپاسییا وه‌زیرێ ساخله‌مییێ و جه‌نابێ وه‌زیر و پارێزگارێ هه‌ولێرێ دكه‌ت كو گه‌له‌ك ب جددى د هه‌وارا برینداران چوون.