یانه‌یا دهۆك بریاردا خوه ژ خۆلا نایابا كوردستانێ ڤه‌كێشیت، به‌رپرسێ راگه‌هاندنا یانه‌یێ ژى دیاركر، دكۆمبوونا ده‌سته‌یا گشتییا یانه‌یێدا ل چارشه‌مبییا بهێت، بریارا خوه ڤه‌كێشانێ دێ هێته ئێكلاكرن.
شڤان محه‌مه‌د به‌رپه‌رسێ راگه‌هاندنا یانه‌یا دهۆك بۆ ئاژانسا خانى دیاركر، ل رۆژا چارشه‌مبییا بهێت كارگێرییا یانه‌یێ دێ دگه‌ل ده‌سته‌یا گشتی كۆمبیت و دانوستاندنان ل سه‌ر چه‌ند بابه‌تان كه‌ت و ته‌وه‌رێ بریارا خوه‌ڤه‌كێشانێ ژ خولێن كوردستانێ ژی دێ ئێك ژ وان بیت ، بریارا دووماهییێ كارگێریێ دایه ودێ دگه‌ل ده‌سته‌یا گشتی گوتوبێژ كه‌ت و ئێكلاكه‌ت .
زێده‌تر شڤان محه‌مه‌د ل دۆر ئه‌گه‌رێن خوه ڤه‌كێشانێ ئاشكراكر، كارگێرییا یانه‌یێ ل رۆژا 23ی گۆلانێ بریارا خوه ڤه‌كێشانێ برێكا پرێس كونفرانسه‌كێ رۆژنامه‌ڤانی دابوو و ئێكه‌تییا كوردستانێ پێ ئاگه‌هداركربوویه كو پشكدارییێ دخۆلێن كوردستانێدا ناكه‌ت، ئه‌گه‌ر ژى ئه‌و ڕوودانه‌بوون یێن دیارییا فینالا كۆپا كوردستانێدا به‌رامبه‌ر یانه‌یا پێشمه‌رگه‌ى هه‌ولێرێ هاتینه پێش، كو دادڤانێ یارییێ هه‌تا ده‌مژمێره‌كێ ژى به‌رى یارییێ نه‌هاتبوو ده‌ستنیشانكرن، هه‌روه‌سا ئێكه‌تییا كوردستانێ یاریگه‌ها فره‌نسو حه‌ریرى ب رێڤه‌نه‌دبر، به‌لكو سه‌رپه‌رشتیكرنا وێ د ده‌ستێن كارگێرییا یانه‌یا هه‌ولێردابوو ، پشتى یارییێ ژى هێزێن پۆلیسان شه‌ر و ئالوزى دگه‌ل جه‌ماوه‌رێ دهۆكێ كرن و ب توندی ئێشاندن، چ كه‌س نه ژ ئێكه‌تییا كوردستانێ و نه ژ به‌رپرسێن هه‌ولێرێ ژى دهه‌وارا وان نه‌چوون، ئه‌ڤه‌ژى ئێك ژ ئه‌گه‌رێن بریارا خوه ڤه‌كێشانێ بوو و ئه‌وچه‌نده ژی دیاركر، پشته‌ڤانێن یانه‌یا دهۆك بۆ وان ژ هه‌ر چالاكییه‌كێ گرنگترن و وان نه‌ڤێت چ كه‌سه‌ك بهێته ئێشاندن.
ئاماژه ب هندێ ژى دا، سه‌رۆكێ ئێكه‌تییا كوردستانێ ب شێوه‌یه‌كێ ئاشكرا داخویانییان ب دژى یانه‌یا دهۆكێ د ده‌ت، دیارییا خۆلا نایابا عیراقێدا به‌رامبه‌ر یانه‌یا زاخۆ دیاركربوو، دهۆك نه‌شێت كونترۆلێ ل سه‌ر جه‌ماوه‌رێ خوه بكه‌ت، بۆ ڤێ یارییێ پشته‌ڤانێ یانه‌یا زاخۆیه، هه‌روه‌سا دكۆمبوونا دووهى یا ئێكه‌تییێدا راگه‌هاندبوو كو دهۆكێ ماف نینه خوه ڤه‌كێشیت، ئه‌گه‌ر ژ بریارا خوه لێڤه نه‌بیت دڤێت ژ خۆلا نایابا عیراقێ ژى بهێته دوورخستن، له‌ورا ئه‌و داخو‌یانیێن سه‌رۆكێ ئێكه‌تیێ ب حێبه‌تی دبینن و دوورن ژ بۆچوونا ئه‌ندامێن دی یێن ئێكه‌تییا فۆتبۆلێ.
