كۆمیسیۆنا هه‌لبژارتنێن عیراقێ : هه‌لبژارتنێن هه‌رێما كوردستانێ دێ ل ده‌مێ خوه‌ هێنه‌كرن

به‌رپرسه‌كێ كۆمیسیۆنا هه‌لبژارتنێن عیراقێ دیاركر، ل هه‌یڤا بهێت دێ ده‌ست ب تۆماركرنا حزب، هه‌ڤپه‌یمانى و به‌ربژاران بۆ هه‌لبژارتنێن په‌رله‌مانێ كوردستانێ هێته‌ كرن، چ ده‌رفه‌ت بۆ پاشخستنا هه‌لبژارتنان نینن.

عیماد جه‌میل سه‌رۆكێ تیما رۆژنامه‌ڤانییا كۆمیسیۆنا بلندا سه‌ربه‌خۆ یا هه‌لبژارتنێن عیراقێ دیاركر، ل ئێكى چریا دووێ یا 2023ێ دێ ده‌ست ب تۆماركرنا حزب، هه‌ڤپه‌یمانى و به‌ربژاران بۆ هه‌لبژارتنێن په‌رله‌مانێ كوردستانێ هێته‌كرن.

ل دووڤ ئاخڤتنێن عیماد جه‌میلى، كۆمسیۆنا هه‌لبژارتنێن عیراقێ خشته‌یێ كاركرنێ یێ تایبه‌ت ب هه‌لبژارتنێن په‌رله‌مانێ كوردستانێ تمامكرییه‌ و دێ د كۆمبوونا ڤێ حه‌فتییێدا په‌سه‌ند كه‌ت.

سه‌رۆكێ تیما رۆژنامه‌ڤانییا عیراقێ ل دۆر ئه‌گه‌رێن پاشخستنا هه‌لبژارتنێن په‌رله‌مانێ كوردستانێ دبێژیت: هه‌تا نوكه‌ هنده‌ك كه‌س هه‌نه‌ دبێژن هه‌لبژارتنێن جڤاتێن پارێزگه‌هان ژى دێ هێنه‌ پاشخستن، لێ چ تشته‌كێ وه‌سا نینه‌ و ئه‌و كارێ خوه‌ دكه‌ن، چ ده‌رفه‌ت بۆ پاشخستنا هه‌لبژارتنێن په‌رله‌مانێ كوردستانێ نینن، ژبه‌ركو نڤیسارا فه‌رمییا سه‌رۆكایه‌تییا هه‌رێما كوردستانێ ل به‌رده‌سته‌ و دێ كار ل سه‌ر كه‌ن.