پرۆژه‌یێ ریسایكلینا قێرى رۆژانه‌ دوو هزار ته‌نێن قێرى به‌رهه‌م دئینیت

بۆ جارا ئێكێ ل سه‌ر ئاستێ هه‌رێما كوردستانێ و عیراقێ، كارگه‌هه‌كا بكارئینانا ( ریسایكلینا ) قێرى ل هه‌رێما كوردستانێ هاته‌ دامه‌زراندن، ئه‌ڤ كارگه‌هه‌ دێ ئه‌وى قێرێ دهێته‌ هه‌لكۆلان و راكرن كه‌ته‌ كه‌لوپه‌لێن ده‌ستپێكێ یێن قێرى و جاره‌كا دى بكارئینیت.

كارگه‌هـ ب ئێك ژ پێشكه‌ڤتیترین كارگه‌هێن بكارئینانا قێرى دهێته‌ هژمارتن، رۆژانه‌ شیانێن به‌رهه‌مئینانا دوو هزار ته‌نێن قێرى هه‌یه‌ و تماما كارمه‌ندێن وێ ژى حكومینه‌.

كارێ ڤێ كارگه‌هێ یا كو ب كارمه‌ندێن حكومى ب رێڤه‌ دچیت، ژ بكارئینانا قێرى بكارهاتى و به‌رهه‌مئینانا قێرێ نوو پێك دهێت، گرنگییا پرۆژه‌یى ژى ئه‌وه‌ كو ژینگه‌هێ پیس ناكه‌ت، خه‌رجییێن سووته‌مه‌نی و پاره‌ى كێمتر لێ دهێن، دشیاندایه‌ هه‌ر ده‌مژمێره‌كێ 200 ته‌نێن قێرى به‌رهه‌م بینیت، ئه‌ڤه‌ ژى ده‌رفه‌ته‌كا باشه‌ كو به‌هرا پترا جادده‌یێن باژێر و باژێركان پێ بهێنه‌ نووكرن.

ئێدى ئه‌و قێرێ ژ جادده‌یان دهێته‌ هه‌لكۆلان، ئێكسه‌ر دێ بۆ ڤێ كارگه‌هێ هێته‌ ڤه‌گۆهاستن و دووباره‌ بۆ قێركرنا كۆنج و كووران هێته‌ بكارئینان، ئه‌ڤ كارگه‌هه‌ ژینگه‌هێ پیس ناكه‌ت و دێ خه‌رجییێن به‌رهه‌مئینانا قێرى ژى كێم كه‌ت.