ئاژانسا خانی:
قایمقامێ قەزا شنگال ئاشكەراكر، ژ دەستپێكا سالا 2023 هەتا نوكە زێدەتری دوو هزار و 600 خێزانێن شنگالێ ڤەگەڕیاینە دەڤەرێن خۆ و ب گشتی 20 هزار خێزان هەتا نوكە ڤەگەڕیاینە.
نایف سەیدو، قایمقامێ قەزا شنگال بۆ ئاژانسا خانی گۆت ژی: دەستێوەردانا ناڤخۆیی و هەرێمی و ناڤدەولەتی ل شنگالێ هەیە و بڕیارا وێ ددەستێ خەلكێ وێ دا نینە، بەلكو وەلاتێن دی كۆم دبن و ل سەر شنگالێ ڕێككەفتنان دكەن بێی پرس ب خەلكێ وێ بهێتەكرن.
گۆت ژی: دەستنیشانكرنا قایمقامی ئێك ژ بڕگەیێن ڕێككەفتنا شنگالێ یە، لێ هەتا نوكە كەس نەهاتییە دەستنیشانكرن و نەهاتییە جێبەجێكرن و ب فەرمی چ ناڤ وەكو بەربژار نەهاتینە ئێكلایكرن.
ل دور ڕێككەفتنا شنگالێ ژی نایف سەیدۆ دیاركر، ڕێككەفتنا شنگالێ دێ پشكەكا ئاریشێن وێ چارەسەركەت، لێ چارەسەرییا بنەڕەتی جێبەجێكرنا ماددێ 140 یێ دەستوورێ عیراقێ یە و پێدڤییە خەلكێ شنگالێ بڕیارێ ل سەر چارەنڤیسێ خۆ بدەت.
ڕێككەفتنا دناڤبەرا حكومەتا هەرێما كوردستانێ و حكومەتا عیراقێ دا بۆ ئاسایكرنا ڕەوشا شنگالێ ل چریا ئێكێ یا سالا 2020 هاتە ئیمزاكرن. ڕێككەفتن ژ چەند خالان پێكهاتییە و گرنگترین خال دەركرنا هەموو هێزێن چەكدار یێن حەشدا شەعبی و هێزێن نێزك ژ پارتا كرێكارێن كوردستانێ – پە*كە*كێ یە ژ شنگالێ. ل گەل ڕاسپاردنا ئەركێ پاراستنا ئێمناهییا باژێڕی ب پۆلیس و دەزگەهێن ئەمنی و هەوالگڕییا فیدڕالی، هەروەسا دانانا قایمقامەكێ نوی بۆ شنگالێ و ئاڤەدانكرنا باژێڕی و رەخساندنا زەمینەكا گۆنجای بۆ ڤەگەڕیانا ئاواران، لێ هەتا نوكە ڕێككەفتن نەهاتییە جێبەجێكرن.
