سه‌رۆك نێچیرڤان بارزانى پێشوازی ل نادیا موراد كر

نێچیرڤان بارزانى سه‌رۆكێ هه‌رێما كوردستانێ پێشوازى ل نادیا موراد چالاكڤانا ئێزدى و هه‌لگرا خه‌لاتێ نۆبل بۆ ئاشتییێ و سه‌رۆكا رێكخراوان ده‌ستپێشخه‌رییا نادیا كر.

 د دیداره‌كێدا ره‌وشا ئێزدییان و پررۆسه‌یا ڤه‌گه‌راندنا ئاواره‌یێن ئێزدى ژ كه‌مپان بۆ جهێن وان ل شنگال و ده‌ڤه‌رێ، رۆلێ رێكخراوێن نێڤدوله‌تى بۆ هاریكاریكرنا ئێزدییان و رێوره‌سمێ دووهى یێ ڤه‌كرنا مۆنۆمێنتا قوربانییێن ئێزدییان ل شنگالێ هاتنه‌ گوتوبێژكرن.

هه‌ردوو لایان دووپاتى ل گرنگییا هه‌بوونا ئارامى و سه‌قامگێرییێ ل ده‌ڤه‌رێن ئێزدییان كر، بۆ هندێ ئه‌و ئاواره‌ بشێن ڤه‌گه‌رنه‌ جهێن خوه‌، هه‌روه‌سا به‌حسا گوهۆرینێن ل به‌رده‌م كۆمه‌لگه‌ها ئێزدییان و چه‌وانییا هاریكاریكرنا وان كر، سوپاسییا وان وه‌لاتان كر یێن ب هه‌ر شێوه‌یه‌كى هاریكارییا ئێزدییان دكه‌ن.

سه‌رۆك نێچیرڤان بارزانى زێده‌بارى ده‌ستخۆشییێ ل ب رێڤه‌برنا رێوره‌سمێن دووهى یێن بیرهاتنێن ئێزدییان، دووپاتى ل گرنگییا ب دۆكیۆمێنتكرنا تاوانێن داعشێ به‌رامبه‌ر ئێزدییان و بزاڤكرن بۆ رێگرتنێ ژ دووباره‌بوونا ئه‌وان تاوانان كر.

د ته‌وه‌ره‌كێ دییێ دیدارێدا سه‌رۆكێ هه‌رێما كوردستانێ دووپات كر، هندى ره‌ڤاندییه‌كێ ئێزدى مابیت، بزاڤێن وان بۆ قورتالكرن و دیاركرنا چاره‌نڤیسێ وان دێ یێ به‌رده‌وام بیت.