ب ئاماده‌بوونا مه‌سرور بارزانى سه‌رۆكێ حكومه‌تا هه‌رێما كوردستانێ ئاهه‌نگا ( خۆلا شه‌هیدێ سه‌ربه‌ست ) یا ده‌رچوویێن پۆلیسێن هه‌ولێرێ یێن تایبه‌ت ب ( ده‌ست ب سه‌رداگرتن، دوورپێچكرن و ئازادكرنا ئێخسیران ) ب رێڤه‌چوو.
سه‌رۆكێ حكومه‌تێ د رێوره‌سماندا گوتاره‌ك پێشكێشكر و دووپاتى ل هندێ كر، پشكه‌كا گرنگ یا ئه‌ركێ كارمه‌ندێن پۆلیس و هێزێن ئاسایشا ناڤخۆ، پاراستنا ئاسایش و ته‌ناهى و دابینكرنا ئارامى و سه‌قامگێرییێ و نه‌هێلانا تاوان و رووبرووبوونا تاوانبارایه، یا ژ وێ ژى گرنگتر ئه‌وه كا دێ چه‌وا ب شێوه‌یه‌كێ یه‌كسان و دادپه‌روه‌رانه و دچارچووڤێ قانوونێ و رێزگرتن و پاراستنا مافێن مرۆڤیدا، سه‌ره‌ده‌رییێ دگه‌ل وه‌لاتییان ب گشتى كه‌ن و چه‌وا سه‌رپێچكار و تاوانباران راده‌ستى دادگه‌هێ كه‌ن.
مه‌سرور بارزانى ئاماژه بهندێ كر، خوشبه‌ختانه ئێك ژ ئه‌گه‌رێن وێ ئاسایش و سه‌قامگێرییا ل كوردستانێ هه‌ى كو بوویه ده‌ستكه‌ڤت و سیمایه‌كێ گه‌شێ هه‌رێما كوردستانێ، بۆ وێ هه‌ماهه‌نگى و هاریكارى و په‌یوه‌ندییا ب هێز ڤه‌دگه‌ریت، یا دناڤبه‌را خه‌لكێ كوردستانێ و ده‌زگه‌هێن ئێمناهییێدا هه‌ى.
