كۆمیته‌یا ناڤه‌ندییا پارتى دیموكراتى كوردستان ب سه‌رپه‌رشتییا سه‌رۆك بارزانى و ئاماده‌بوونا نێچیرڤان بارزانى، مه‌سرور بارزانى و ئه‌ندامێن كۆمیته‌یێ كۆمبوو، د ڕاگه‌هاندنه‌كێدا دیاركر، ئه‌و ئومێده‌وارن ب زووترین ده‌م ب دووماهى ب ئاریشه و ئاسته‌نگان بهێت و چاره‌سه‌رییا بنه‌ره‌ت بۆ بابه‌تێ مووچه، شایسته‌یێن داراییێن هه‌رێمێ و تماما بابه‌تێن دى بهێته دیتن، كو دبه‌رژه‌وه‌ندییا پرۆسه‌یا سیاسی و سه‌قامگێرییا وه‌لاتیدانه.
سه‌باره‌ت ره‌وشا كه‌ركووكێ د ڕاگه‌هاندنێدا هاتییه، ژ پێخه‌مه‌ت پاراستنا گیانێ ته‌بایى و سه‌قامگێرییا باژێرێ كه‌ركووكێ و پێزانین و رێزگرتن بۆ خه‌لكێ خۆراگر و تێكوشه‌رێ ڤى باژێرى كو ده‌مه‌كێ درێژه خۆراگرن و به‌رده‌وام قوربانی ژ پێخه‌مه‌ت ئارمانجێن خوه یێن ڕه‌وا داینه، بریار هاته دان ئاڤاهییێ جڤاتا سه‌ركردایه‌تییا پێشتر ل كه‌ركووكێ، پێشكێشى زانكۆیا كه‌ركووكێ بهێته‌كرن، وه‌كو دیارییه‌ك بۆ قوتابییێن وى باژێرى و پرۆسه‌یا خواندن و ره‌وشه‌نبیرى و پێشخستنا باژێرى، هه‌ڤده‌م دكۆمبوونێدا سوپاسییا محه‌مه‌د شیاع سوودانى سه‌ركوه‌زیرێن حكومه‌تا فیدرال هاته كرن، به‌رامبه‌ر ده‌ركرنا بریارا ڕاده‌ستكرنا باره‌گایێن پارتى د وى باژێریدا.
ب سه‌رپه‌رشتییا جه‌نابێ سه‌رۆك مه‌سعوود بارزانى، كۆمیته‌یا ناڤه‌ندییا پارتا مه ئه‌ڤرۆ پێنجشه‌مبى 26-10-2023ێ ل پیرمام ب ئاماده‌بوونا جێگرێن سه‌رۆكى و ئه‌ندامێن كۆمیته‌یا ناڤه‌ندى و یه‌ده‌كان كۆمبوونا خوه یا ئاساییى كر.
كۆمبوونێ ب ئێك خۆله‌ك راوه‌ستییان بۆ ڕیزگرتنێ ل گیانێ پاقژێ شه‌هیدێن كوردستانێ و سه‌روه‌رێ وان بارزانییێ نه‌مر و كاك ئیدریسێ هه‌رده‌م ل بیر ده‌ستپێكر، دووڤدا هزر و بیر ل سه‌ر بابه‌تێن گرنگ و كارتێكرنێن ده‌ڤه‌رێ و عیراقێ و كوردستانێ ب تایبه‌تى و جیهانێ ب گشتى هاتنه لێك گۆهارتن و بریارێن پێدڤى بۆ ڤان ته‌وه‌ر و بابه‌تان هاتنه دان :
ته‌وه‌رێ ئێكێ / ره‌وشا سیاسییا عیراقێ و هه‌رێمێ و ده‌ڤه‌رێ ب گشتى : كۆمبوونێ ره‌وشا نوكه یا ده‌ڤه‌رێ و ڕوودان و پێشهات و كارتێكرنێن وان ل سه‌ر هه‌رێمێ و عیراقێ ژ هه‌موو لایانڤه خسته به‌ر دانوستاندنێ، هه‌روه‌سا هه‌لسه‌نگاندن بۆ په‌یوه‌ندییێن مه دگه‌ل حكومه‌تا فیدرال و لایه‌نێن سیاسییێن دكابینه‌یا حكومه‌تێدا پشكدار، هاته كرن، تیشك خسته سه‌ر لێكتێگه‌هشتنێن ڤێ دووماهییێ یێن دناڤبه‌را هه‌ردوو حكومه‌تێن هه‌رێم و فیدرالدا، كو پێنگاڤ ب ئاراسته‌یێ چاره‌سه‌ركرنا ئاریشه‌یان دهێنه هاڤێتن، ئومێده‌وارین ب زووترین ده‌م دووماهى ب ئاریشه و ئاسته‌نگان بهێت و چاره‌سه‌رییا بنه‌ره‌ت بۆ بابه‌تێ مووچه، شایسته‌یێن داراییێن هه‌رێمێ و تماما بابه‌تێن دى بهێته دیتن، كو دبه‌رژه‌وه‌ندییا پرۆسه‌یا سیاسى و سه‌قامگێرییا وه‌لاتیدانه.
ته‌وه‌رێ دووێ / بابه‌تێ په‌یوه‌ندییێن ناڤخۆ یێن هه‌رێمێ و لایه‌نێن سیاسى : كۆمبوونێ بریاردا، وه‌كو هه‌ر جار ژ پێخه‌مه‌ت به‌رژه‌وه‌ندییا دۆزا ڕه‌وا یا گه‌لێ مه و ب هێزتركرنا قه‌واره‌یێ سیاسى و قانوونییێ هه‌رێما كوردستانێ و لێكتێگه‌هشتن و هاریكارییێ، پارتا مه دێ ل سه‌ر دیدار و دانوستاندنان دگه‌ل هێز و لایه‌نێن سیاسییێن دحكومه‌تێدا پشكدار و نه‌پشكدار، هه‌روه‌سا ب هێزخستنا خالێن هه‌ڤپشك و ئیداره‌دانا ئه‌وان جۆداهییان یێن گه‌ل پره‌نسیپێن نه‌ته‌وه‌یى و نیشتیمانییێن مه د ناكۆك نینن یا به‌رده‌وام بیت.
ته‌وه‌رێ سێیێ / بابه‌تێ باره‌گایێ پارتا مه ل كه‌ركووكێ : ژ پێخه‌مه‌ت پاراستنا گیانێ ته‌بایى و سه‌قامگێرییا باژێرێ كه‌ركووكێ و پێزانین و رێزگرتن بۆ خه‌لكێ خۆراگر و تێكوشه‌رێ ڤى باژێرى، كو ده‌مه‌كێ درێژه دخۆراگرن و به‌رده‌وام قوربانی ژ پێخه‌مه‌ت ئارمانجێن خوه یێن ڕه‌وا داینه، پارما مه بریاردا ئاڤاهییێ جڤاتا سه‌ركردایه‌تییا خوه یا پێشتر ل كه‌ركووكێ، پێشكێشى زانكۆیا كه‌ركووكێ بكه‌ت، وه‌كو دیارییه‌ك بۆ قوتابییێن وى باژێرى و پرۆسه‌یا خواندن و ڕه‌وشه‌نبیرى و پێشخستنا باژێرى، هه‌ڤده‌م كۆمبوونێ سوپاسییا محه‌مه‌د شیاع سوودانى سه‌ركوه‌زیرێن حكومه‌تا فیدرال كر، به‌رامبه‌ر ده‌ركرنا بریارا ڕاده‌ستكرنا باره‌گایێن پارتى د وى باژێریدا.
ته‌وه‌رێ چارێ / بابه‌تێ حكومه‌تا هه‌رێما كوردستانێ : كۆمبوونێ زێده‌بارى تیشك خستنێ ل سه‌ر هه‌لومه‌رج و ئاسته‌نگێن به‌رده‌م كابینه حكومه‌تا هه‌رێما كوردستانێ د بجهئینانا به‌رنامه و بریاراندا، پشته‌ڤانییا خوه بۆ حكومه‌تێ و داموده‌زگایێن هه‌رێمێ دپێنگاڤێن وێدا بۆ خزمه‌تكرنا زێده‌تر یا خه‌لكێ هه‌رێما كوردستانێ و پێشكێشكرنا خزمه‌تگوزارییان د بیاڤێن جۆدا دا،هه‌روه‌سا ل بزاڤێن حكومه‌تێ بۆ دابینكرنا مووچه و به‌رده‌وامى و پێشڤه‌برنا پرۆژه‌یان ده‌ربرى.
