وەزارەتا كاروبارێن شەهید و ئەنفالكرییان ڕاگەهاند، پارچێن ئەردی دێ ب زیندانییێن سیاسی هێنەدان ب مەرجەكی، پێشتر وەك زیندانییێن سیاسی سوودمەند نەبن.
وەزارەتا كاروبارێن شەهید و ئەنفالكرییان د ڕوونكرنەكێ دا ئاماژە ب ماددێ شەشێ، بڕگا ئێكێ یا یاسایا ئمتیازاتێن زیندانییێن سیاسی یێن كوردستانێ كریە وتێدا هاتییە، هەر زیندانییەكێ سیاسی دێ پارچەیەكا ئەردی وەرگریت، ب مەرجەكی پێشتر وەك زیندانییێن سیاسی ژ ئمتیازاتان سوودمەند نەبن.
دیار ژی كریە، ماددێ ئێكێ، بڕگا ئێكێ یا پەیڕەوا ژمارە 8 یا سالا 2020 یا جڤاتا وەزیراندا، پێناسا زیندانیكریێن سیاسی ب ڤی ڕەنگی دكەت: زیندانییێ سیاسی ئەو كەسەیە كو هاتبیتە گرتن، یان زیندان كرن، ب ئەگەرێ دەربڕینا نەڕازیبوونێ بەرامبەر ب ڕژێمێن ئێك ل دویڤ ئێك یێن عیراقێ تا 9/4/2023، لسەر ڕادەربرین و بیروباوەر یان ئینتیمایا نشتیمانی یان سیاسی، یان هاریكاریكرن یان پشكداریكرنێ د لڤینا ڕزگاریخوازا كوردستانێ دا و بڕیارا سزادانا وان ژلایێ ئێك ژ دادگەهان یان دەستهەلاتێن سەر ب ڕژێمێن ناڤهاتی ڤە هاتبیتە دان.
هەروەسا د بڕگەیا دووێ یا هەمان ماددە دا هاتییە، هەركەسەك هاتبیتەگرتن یان ڕاگرتن بێ كو بڕیارا سزادانێ بۆ وی ژلایێ دادگەها تایبتمەند ڤە دەرچووبیت، هەمان ئەگەرێن كو د خالا ئێكێ یا ڤی ماددەی دا هاتین ژێ دگرن.
ل دویڤ ماددێ سییێ بڕگا چوارێ، ئەوێن ل ناڤ زیندانان ژدایكبووین ب هەمان شێوە ب زیندانییێن سیاسی دێ هێنە هەژمارتن و سوودمەند بن ژ هەموو ئمتیازاتێن ئاماژەپێكری د یاسا و پەیڕەوو و ڕێنماییێن هەما یاساییێ دا، دناڤ وان ژی دا سوودمەند بوون ژ پارچەكا ئەردی.
بوویە پالپشت ب وێ ڕوونكرنا یاسایی، د خێزانەكێ دا ڕەنگە چەندین كەسان ئەڤ یاسایە ژێ بگریت و دشێن سوودمەندبن ژ وان ئمتیازاتان بێی ل بەرچاڤگرتنا ژمارا ئەندامێن سوودمەند د هەمان مال دا.
د هەمان دەمدا، ئەو كەسێن دناڤ زیندانان دا ژدایكبووین، ل دویڤ ماوێ گرتنا دەیكا وان گرتنا وان دێ بۆ هێتە هەژمارتن، ئەڤە ژی پالپشت ب ماددێ سییێ، بڕگا چوارێ یا هەمان پەیڕەو و ماددێ 7 یێ ڕێنماییێن ژمارە 1 یا سالا 2021 یا وەزارەتا كاروبارێن شەهید و ئەنفالكرییان.
