وه‌زیرێ ده‌رڤه‌ یێ ئه‌مریكا چه‌ندین پەیام گەهاندنە حكومه‌تا عیراقێ

ئاژانسا خانی:

د. نەوزاد هێتۆتی، مامۆستایێ زانستێن سیاسی ل زانکۆیا سەلاحەدین ل هەولێرێ، بۆ ئاژانسا خانی گۆت: زێدەباری گەفێن گروپێن شیعی، سەبارەت سەرەدانا بەرپرسێن ئەمریكا بۆ عێراقێ، بەلێ ئەنتۆنی بلینکن، وەزیرێ دەرڤەیێ ئەمریکا سەرەدانا عیراقێ كر و راستەوخۆ ل گەل محه‌مه‌د شیاع سوودانی سه‌رۆك وه‌زیرێن عیراقێ كۆمبوو، د وێ سەرەدانێ دا بلینکنی، چار پەیامێن گرنگ دانە بەغدا، په‌یاما یا ئێکێ ئەوە، دڤێت حكومەتا عێراقێ ب ئەركێ خۆ رابیت و رێگرییێ ل گرۆپێن میلیشیاتان بکەت، کو ھێرشێ نەکەنە سەر بنگەهێن سەبازی یێن ئەمریكا ل عیراقێ، بلینكنی گۆت ژی، ئەو هێرشێن ژ لایێ گرۆپێن نێزیکی ئیرانێڤە بۆ سەر هێزێن ئەمریکا دهێنە کرن ناهێنە قەبوول کرن و ئه‌مریكا دێ به‌رسڤا وان هێرشان ده‌ت.

ناڤهاتی دیار کر ژی، پەیاما دووێ ئەوە، ئەمریكا بێ دەنگ نابیت بەرامبەر ب ئارمانج كرنا بەرژەوەندیێن وێ و ئەو ھێرشێن دهێنە كرن بۆ سەر بنگەهێن وێ یێن له‌شكه‌ری، لەوما ب رەنگەکێ راستەۆخۆ، ئەمریکا ژی دێ گرۆپێن میلیشیاتان کەتە ئارمانج و دێ مۆشەک باران کەت، هەروەسا پەیاما سێیێ ئەوە، دڤێت حكومەتا عێراقێ رێکێ ل گرۆپێن میلیشیاتان بگریت، کو  ب موشەك و دروونان ب رێیا عێراقێ ھێرشێ نەكەنە سەر ئیسرائیلێ، دڤێت سنوورەک بۆ وان بهێتە دانان، پەیاما چارێ ئەوە، ئەمریکا ل گەل هندێیە کو بازنێ شەرێ غەززە بەرفرەھ نەبیت، بەلێ ئەگەر ئیران یان ھەڤپەیمانێن وێ  بەرەیەكێ دیتر یێ شەری ڤەكەن، راستەوخۆ ئەمریکا دێ دربان ل ئیرانێ دەت، هەر چەندە  ئەنتۆنی بلینکنی، د سەرەدانا خۆدا بۆ بەغدا، ئەو چەندە دیار کر، کو وان نەڤێت ل گەل ئیرانێ رووبروو ئێک ببن، هەر چەندە دێ هەموو رێکاران بۆ پاراستنا هێز و وەلاتیێن خۆ ب كارئینن.