وەزارەتا خواندنا بلند و ڤەكۆلینێن زانستی یا حكومەتا هەرێمێ د بڕیارەكێ دا درێژی ب داشكاندنێن كرێیا خواندنا قۆتابییان ل زانكۆ و پەیمانگەهان دا و دهەمان دەم دا پێدانا قستێ پێشوەخت وەكو مەرجێ دەستپێكرنا خواندنێ لادا.
عەباس ئەكرەم، پەیڤدارێ وەزارەتا خواندنا بلند ب فەرمانگەها میدیا و زانیاری ڕاگەهاند، ب لبەرچاڤگرتنا ڕەوشا خێزانێن قۆتابییان، ئەڤسالە ژی وەكو سالێن بووری وەزارەتێ بڕیاردا داشكاندنێ بۆ كرێیا خواندنێ ل زانكۆ و پەیمانگەهێن حكومی و تایبەت بكەت.
دیار ژی كر، بۆ سالا خواندنێ 2023 – 2024، بۆ زانكۆ و پەیمانگەهێن تایبەت داشكاندن ژ 10% هەتا 20% بۆ هەمی قۆناغان دێ هێتەكرن كو دێ زێدەتری 31 هزار خوێنكاران ژێ سوودمەندبن. هەروەسا ل زانكۆ و پەیمانگەهێن حكومی بۆ خواندنا پارالێل و ئێڤاران داشكاندنا 45% دێ هێتەكرن.
