ئەڤرۆ ئێكشەمبی12 ی چریا دووێ 2023 ێ”، مەسرور بارزانی، سەرۆكێ حكومەتا هەرێما كوردستانێ، ل گەل حەییان عەبدولغەنی، جێگرێ سەرۆكوەزیران و وەزیرێ په‌ترۆلا عیراقێ و شاندێ ل گه‌ل دا” كو ژ بریكار و رێڤەبەرێن گشتی ل وەزارەتێ و رێڤەبەرێ گشتییێ كۆمپانیا (سۆمۆ) پێكهاتبوو، كۆمبوو.
د وێ كۆمبوونێ دا بیروڕا ده‌ربارەیی ڕێكار و پێنگاڤێن هنارتنا په‌ترۆلا هەرێما كوردستانێ لێكگۆهارتن.
سەرۆكێ حكومەتێ ئامادەییا هەرێما كوردستانی بۆ دەستپێكرنا هنارتنا په‌ترۆلا هەرێمێ دوپات كر، ئەڤه ژی د چارچۆڤێ لێكتێگەهشتنه‌كا هه‌ڤپشك ب ئاراستەیێ بجهئینانا پێدڤییێن دارایی و تەكنیكی یێن پرۆسا هنارتنێ و د چارچۆڤێ بنەمایێن دەستووری و هه‌ڤبەستان و ڕێزگرتنێ د دەستهه‌ڵات و مافێن دەستووری یێن هه‌موو لایەنان و ڤه‌دیتنا چارەسەرییا گونجایی بۆ دەستەبەركرنا خەرجیێن شایستەیێن بەرهەمئینانێ و ڤه‌گوهاستنا په‌ترۆلا هەرێمێ كو دناڤا بودجێ حكومەتا عیراقێ دا تەرخانكرنێن پێدڤی بۆ هاتینه دانان.
سەرۆكێ حكومەتێ گۆت” راوەستیانا هنارتنا په‌ترۆلا هەرێمێ، زیانێن چەندین ملیار دۆلاران گه‌هاندینه گەنجینا گشتی و پێدڤییە د زووترین ده‌مدا، هنارتن دەستپێبكه‌ته‌ڤه” هه‌روه‌سا وەزیرێ ژیده‌رێن سروشتی یێ هەرێمێ ڕاسپاردییه كو هەماهەنگییا ته‌مام ل گەل تیمێ وەزارەتا په‌ترۆلا عیراقێ بكەن كو بڕیارە بۆ چەند ڕۆژان بمیننه ل هەولێرێ.
