بڕیارە 55 هزار سەلێن گلێشی بێ بەرامبەر دێ ل سەر مالان دا هێنە دابەشکرن

ئەڤرۆ ڕۆژا دووشەمبی 13 چریا دووێ 2023، ل سنوورێ باژێرڤانیا ئاکرێ دەست ب دابەشکرنا سەلێن گلێشی یێن 120 لێتری دا هاتە کرن.

بلند رزا زبێر، سەرۆکێ باژێرڤانیا ئاکرێ بۆ ئاژانسا خانی ڕاگەهاند، بڕیارە د دەمێ شەش هەیڤێن بهێت دا ل سنوورێ 20 باژێرڤانیێن قەزایێن(ئاکرێ، بەردەڕەش، شێخان) 55 هزار سەلێن گلێشی یێن 120 لێتری ل سەر وەلاتیان دا بهێنە دابەشکرن ب مەرەما پاقژ ڕاگرتنا ژینگەهێ و بۆ ب ساناهیکرنا ژێکجوداکرنا گێلێ تەر و هشک.

سەرۆکێ باژێرڤانیا ئاکرێ گۆتژی:”هەر ئەڤرۆ ل سنوورێ باژێرڤانیا ئاکرێ 6 هزار سەلێن گلێشی، بێ بەرامبەر وەکو دیاری ژ لایێ حکومەتا هەرێما کوردستانێ ڤە لسەر وەلاتیان دا هاتنە دابەشکرن و پرۆسەیا دابەشکرنا سەلێن گلێشی یێن 120 لتری دێ بۆ دەمە شەش هەیڤێن بهێت ب چەند قۆناغێن جودا جودا یا بەردەوام بیت تا کو ژمارا دابەشکرنێ دگەهیتە 55 هزار سەلێن گلێشی ل سنوورێ قەازیێن (ئاکرێ، شێخان، بەردەرەش).”

بلند رزا زبێر دیارکر ژی، بۆ هەر مالەکێ ئێک سەلەیا گلێشی دێ هێتە دابینکرن و ل دەمێ ڕادەستکرنێ دێ ناڤ و ژمارا تەلەفۆنا خودانێ هێتە وەرگرتن.