دەستەیا وەبەرهێنانێ: بوها دێ بۆ قستێن یه‌كه‌یێن ئاكنجیبوونێ هێته‌ دیار كرن

ئاژانسا خانی

په‌یڤدارێ دەستەیا وەبەرهێنانێ دیا كر، ل حه‌فتییا بوری دەستەیا وەبەرهێنانێ کۆمبوونەك ل گه‌ل هه‌موو خودانێن یه‌كه‌یێن ئاكنجیبوونێ ل پارێزگه‌هـ و ئیدارێن سەربەخۆ ئه‌نجامدایه‌، بۆ هندێ بوهایه‌كێ جهگیر بۆ دۆلاری بهێته‌ دانان بۆ ئەوێن قستێن خۆ ل یەکەیێن ئاكنجیبوونێ دده‌ن.

بەرگەشت ئاکرەیی، گۆت ژی، ئه‌ڤه‌ هه‌یامه‌كه‌ بوهایێ دۆلاری یێ جهگیر نینە، وه‌لاتی ژی گه‌له‌ك گازندان دكه‌ن” یێن كو قستێن یەکەیێن ئاكنجیبوونێ ل سه‌ر هه‌ین، دۆلاری ژی کاریگەری کرییە سەر ره‌وشا وان یا ئابووری، ل سەر داخوازییا خه‌لكی و وەک هەستکرن ب بەرپرسیاریه‌تییێ ژ لایێ دەستەیا وەبەرهێنانێ، ئه‌م بزاڤێ دكه‌ین چارەسەرییێ ب بینین بۆ ڤێ ره‌وشا هه‌یی.

هێشتا دبێژیت: ئه‌وێن یەکەیێن ئاكنجیبوونێ هه‌ین، دەستەیا وەبەرهێنانێ نوكه‌ بزاڤان دكه‌ت بگه‌هیته‌ چارەسەرییه‌كێ، کو بلندی و داكه‌فتنا دۆلاری کاریگەری ل سه‌ر وه‌لاتییان نه‌بیت، یان زیان نه‌گه‌هیته‌ وان، مه‌ بریاردایه‌ ل حه‌فتییا بهێت کۆمبوونەكێ ل گه‌ل هه‌موو خودانێن یەکەیێن ئاكنجیبوونێ بکەین، ل پارێزگه‌هـ و ئیدارێن سەربەخۆ، بۆ هندێ بوهایه‌كێ جهگیر بهێته‌ دانان، بۆ هەر حاله‌ته‌كێ بلند و داكه‌فتنا دۆلاری، هەروەسا کاریگەرییا نه‌رێنی ژی نه‌كه‌ته‌ سه‌ر ژیانا وه‌لاتییان یان ئەوێن قستێن پرۆژێن ئاكنجیبوونی ماینه‌ ل سه‌ر.