به‌غدا دێ سه‌رژمێرییه‌كێ بۆ ئاواره‌یێن هه‌رێما كوردستانێ كه‌ت

وه‌زاره‌تا كۆچ و كۆچبه‌رێن عیراقێ دێ سه‌رژمێرییه‌كێ بۆ ئاواره‌یێن هه‌رێما كوردستانێ كه‌ت بۆ زانینا ژماره‌ و ڕه‌وش و ئه‌گه‌رێن نه‌ڤه‌گه‌ریانێ و پێدڤییێن وان، به‌رپرسه‌كێ وه‌زاره‌تێ ژى دبێژیت: ئه‌گه‌رێن نه‌ڤه‌گه‌راندنێ دێ ب ڕاپۆرته‌كێ ده‌نه‌ لایه‌نێ حكومى بۆ چاره‌سه‌ركرنا ئاریشه‌یان.

عه‌لى جیهانگیر ڕێڤه‌به‌ری لقه‌یان ل وه‌زاره‌تا كۆچ و كۆچبه‌رێن عیراقێ ڕاگه‌هاند، ل هه‌یڤا بهێت دێ سه‌رژمێرییه‌كێ دناڤ ئاواره‌یاندا كه‌ن و ئاواره‌یێن هه‌رێما كوردستانێ ژى ب خۆڤه‌ دگریت، سه‌رژمێرى بۆ نووكرنا زانیارییانه‌ ژ وان ژى، ناڤ، ژماره‌ و پێدڤییان.

ل دووڤ ئامارێن وه‌زاره‌تا كۆچ و كۆچبه‌رێن عیراقێ، 150 هزار خێزانێن ئاواره‌ ل عیراقێ هه‌نه‌ كو به‌هرا پتر یا وان ل هه‌رێما كوردستانێنه‌.

عه‌لى جیهانگیرى ئاشكراكر، د سه‌رژمێرییێدا ئه‌گه‌رێن نه‌ڤه‌گه‌ریانا ئاواره‌یان دێ هێنه‌ تۆماركرن، كا ئه‌گه‌رێن ئه‌منى یان بێكارى و نه‌بوونا جهێ ئاكنجیبوونێنه‌، داكو لایه‌نێن حكومى ل وان ئاریشه‌یان ئاگه‌هدار بكه‌ن و چارسه‌رییان بۆ ببینن.