ئەڤرۆ وەزارەتا سامانێن سرۆشتی ل دور كێمكرنا بهایێ گازا سپی یا مالان ل هەرێمێ، ڕوونکرنەك بەلاڤكر و تێدا دیاركر، بەغدا ب هەر بهایەكی گازێ بۆ وان بهێنێریت، ئەو دێ ب هەمان بهای دەنە وەلاتییان.
د ڕوونكرنا وەزارەتا سامانێن سرۆشتی یا هەرێما کوردستانێ دا هاتییە، ” پشتی كۆمبوونا ڕۆژا 12 چریا دووێ دناڤبەرا وەزارەتا سامانێن سروشتی و وەزارەتا پەتڕۆلا عیراقێ دا ل هەولێرێ، وەزارەتا مە دۆپاتی ل سەر دابینكرنا گازێ بۆ وەلاتییێن پارێزگەهێن هەرێما كوردستانێ کر ب هەمان بهایێ پارێزگەهێن عیراقێ. ”
وەزارەتێ ئاشکەرا ژی کرییە، ل هەیڤێن تەممووز، ئیلون و چریا ئێكێ یێن ئەڤسالە ب سێ نڤیساران و هنارتنا شاندێ وەزارەتێ، وان داخوازی گەهاندییە وەزارەتا پەتڕۆلا عیراقێ ب مەرەما دابینكرنا گازێ بۆ وەلاتییێن هەرێما کوردستانێ ب هەمان بهایێ عیراقێ.
وەزارەتا پەتڕۆلا عیراقێ ژی ب پشتبەستن ب داخوازی و بزاڤێن وەزارەتا سامانێن سروشتی، داخوازییا وان بۆ جڤاتا بلند یا ئابووری یا حكومەتا عیراقێ بلندكریە ب مەرەما دەربڕینا ڕازەمەندییێ.
ئەڤە ددەمەكی دایە دوهی د. عزەت سابر، بریکارێ وەزارەتا پەتڕۆلا عیراقێ ئاشكەراكر، ” پێشتر بەڕمیلەكا گازێ ب 100 هزار دیناران ب وەلاتییێن هەرێمێ دهاتەدان، لێ ژ ڕۆژا 1/12/2023 بهایێ بەڕمیلەكا گازا مالان دێ بیتە 50 هزار دینار. “
