شاندێ دانوستاندكارێ هه‌رێما كوردستانێ ل به‌غدا داخوازا چاره‌سه‌ركرنا سێ بابه‌تان دكه‌ت كو دقانوونا بودجه‌یدا تایبه‌تن ب مووچه، خه‌رجى و پاره‌یێ كۆمپانییین په‌ترۆلێ، بریاره ڕاپۆرته‌ك ل دۆر ڤێ چه‌ندێ ڕاده‌ستى سه‌رۆكوه‌زیرێن عیراقێ بهێته‌كرن، لێ وه‌زیرا داراییا حكومه‌تا فیدرالى یا رازى نینه ژبلى دووماهى كوژمه‌یێ 700 ملیار دینارێن ب قه‌ر بۆ هه‌رێما كوردستانێ، چ پاره‌یه‌كێ دى د ئه‌ڤساله‌دا بهنێریت.
ل دووڤ زانیارییان، شاندێ دانوستاندكارێ هه‌رێما كوردستانێ ل به‌غدا ئه‌ڤرۆ دێ به‌رده‌وامییێ ب كۆمبوونێن خوه دگه‌ل لایه‌نێن به‌غدا یێن په‌یوه‌ندى ب بودجه و پشكا هه‌رێما كوردستانێڤه هه‌ى كه‌ت.
زانیاری دیاردكه‌ن، شاندنێ دانوستاندكارێ هه‌رێما كوردستانێ پێشنیازا چاره‌سه‌ركرنا ئاریشه‌یا هنارتنا پشكا هه‌رێما كوردستانێ كرییه، بریاره لژنه‌یا به‌غدا رێكه‌چاره‌یه‌كێ بۆ ئه‌وان ئاریشه‌یان ب ڕاپۆرته‌كێ بده‌ته سه‌رۆكوه‌زیران بكه‌ت داكو بهێته ئێكلاكرن.
پێشنیازا شاندێ كورد بۆ هه‌مواركرنا قانوونا بودجه‌یا گشتییه و داخوازا هه‌مواركرنا سێ بابه‌تان كرییه، ئه‌و ژى بڕگه‌یا خه‌رجییا راسته‌قینه، دیاركرنا مووچه‌یێ فه‌رمانبه‌رێن هه‌رێما كوردستانێ و به‌لاڤكرنا وى دگه‌ل مووچه‌یێ فه‌رمانبه‌رێن عیراقێ ب شێوه‌یه‌كێ ئێكسه‌ر و گوهۆرینا شێوازێ خه‌رجكرنا شایسته‌یێن داراییێن كۆمپانییێن په‌ترۆلێ ل هه‌رێما كوردستانێ.
