<h3 style="text-align: justify;"><span style="font-size: 18pt;">به‌رپرسه‌كێ وه‌زاره‌تا ساخله‌مییا هه‌رێما كوردستانێ دیاركر، هه‌ر كه‌سه‌كێ ریكلامێ بۆ بابه‌تێن نۆشدارى بكه‌ت، ئه‌گه‌ر خۆ نۆشدار ژى بیت دێ ڕاده‌ستى دادگه‌هێ هێته‌كرن.</span></h3> <h3 style="text-align: justify;"><span style="font-size: 18pt;">د. كاوه خه‌لیل ڕێڤه‌به‌رێ گشتییێ كاروبارێن ساخله‌مى ل وه‌زاره‌تا ساخله‌مییا هه‌رێما كوردستانێ دیاركر، ریكلام بۆ جۆره‌كێ چا و قه‌هوێ هاته كرن كو دێ دماوێ دوو حه‌فتییاندا هه‌شت كیلۆیان ژ كێشا مرۆڤى كێمدكه‌ت، وان نموونه‌یه‌كا وێ چایێ بۆ كۆالیتییا كۆنترۆلى هنارت و ده‌ركه‌ڤت، ماده‌یه‌ك دوێ چایێدا هه‌یه كو دڤێت ل ژێر سه‌رپه‌رشتییا كه‌سین بسپۆر و ل ده‌رمانخانه‌یان بهێته فرۆتن نه‌ك ماركێت و دووكانێن ناڤ كۆلانان.</span></h3> <h3 style="text-align: justify;"><span style="font-size: 18pt;">ل دووڤ ئاخڤتنێن ئه‌وى به‌رپرسێ وه‌زاره‌تا ساخله‌مییێ، پێدڤییه هه‌ر ده‌رمانه‌كێ بۆ هه‌ر مه‌ره‌مه‌كێ بهێته بكارئینان، ل ده‌ستپێكێ پشكنین بۆ بهێته‌كرن، ئه‌گه‌ر چ ماده تێدانه‌بوون و زیان ب كه‌سێ نه‌گه‌هاند، دشیاندایه ژ ده‌رڤه بهێته فرۆتن، به‌رۆڤاژى وێ دڤێت ل ده‌رمانخانه‌یان و پشتى وه‌رگرتنا مۆله‌تا بكارئینانێ بیت، ئه‌وژى نابیت ب به‌رده‌وامى بهێته بكارئینان.</span></h3> <h3 style="text-align: justify;"><span style="font-size: 18pt;">د. كاوه خه‌لیلى ئاشكراكر، وه‌زاره‌تا ساخله‌مییێ لژنه‌یه‌ك پێكئینایه و گه‌له‌ك ب هویرى چاڤدێرییا وان كه‌سان دكه‌ت، یێن ریكلامێ بۆ بابه‌تێن نۆشدارى دكه‌ن و گوت: هه‌ر كه‌سه‌كێ ریكلامێ بۆ هه‌ر بابه‌ته‌كێ نۆشدارى بكه‌ت، ئه‌گه‌ر خۆ نۆشدار ژى بیت، دێ ڕاده‌ستى دادگه‌هێ هێته‌كرن و دڤێت بچیته دادگه‌هێ و به‌رسڤان بده‌ت.</span></h3>
