ڕێڤهبهرییا گشتییا حهج و عومرهیا ههرێما كوردستانێ هۆشدارییێ د دهته وان كۆمپانى و كهسان یێن عومرهكاران ڤهدگۆهێزنه سعوودییێ و دبێژیت: ئهوێن مولهتا ڤهگۆهاستنا عومرهكاران نهبن و ڕۆژانه ل سۆشیال میدیایێ بانگهشهیا برنا خهلكى دكهن، دڤێت ب زووترین دهم دهست ژ ڤى كارى بهردهن، بهرۆڤاژى وێ، دێ ڕووبڕوو سزایێن تۆندێن قانوونى بن.
ڕێڤهبهرییا حهج و عومرهیێ كو سهر ب وهزارهتا ئهوقاف و كاروبارێن ئایینییا ههرێما كوردستانێڤهیه دبێژیت : پێشتر سوزنامه ژ وان كهسان دهاته وهرگرتن یێن ئهڤ كاره دكر، لێ ژ ئهڤرۆ 12-12-2023ێ ههر كهسهكێ پابهندى ههبوونا مولهتا كۆمپانییا حهج و عومرهیێ بۆ ڤهگۆهاستنا عومرهكاران نهبیت، ئێكسهر دێ ل دادگههێ سكالا ل سهر هێته تۆماركرن.
ڕێڤهبهرییا گشتییا حهج و عومرهیێ وهلاتییان ئاگههدار دكهت، ب چ شێوهیان دگهل وان كهسان سهفهرێ نهكهن یین مولهت ژ ڕێڤهبهرییا گشتییا حهج و عومرهیێ نهبیت، ژبهركو ل دهمێ تووشبوونێ ب ههر ئاریشه و ئاستهنگهكێ، ڕێڤهبهرییا حهج و عومرهیێ بهرپرسیار نابیت.
ههروهسا وان كهسان ئاگههدار دكهت یێن ل ژێر ناڤێ ماموستایێن ئایینى ب كارێ ڤهگۆهاستنا عومرهكاران ڕادبن، ئێدى بۆ چ مهرهكا بازرگانى و برنا خهلكى بۆ عومرهیێ ڤێ چهندێ نهكهن.
ل دووماهییێ ڕێڤهبهرییا گشتییا حهج و عومرهیا ههرێما كوردستانێ هۆشدارییهكا توند د دهته وان كۆمپانییان یێن مولهتا فهرمى ههى، ب چ شێوهیان عومرهكار ل سعوودییێ گهشتێ بۆ ( تائف و بهرئاڤێن جهدده ) نهكهن، بهرۆڤاژى وێ دێ لێكۆلینێن قانوونى و كارگێرى دگهلدا هێنهكرن.
