ئەڤرۆ چارشەمبی 20/12/2023 ێ، سەرۆك مەسعود بارزانی ل سەلاحەدین پێشوازی ل ڤیكتۆریا نولاند، جێگرا وەزیرێ دەرڤه یێ ئەمریكا بۆ كاروبارێن سیاسی و شاندێ ل گه‌ل دا كر كو پێكهاتبوون ژ ئەلینا رومەنسكی، بالیۆزا ئەمریكا ل عێراقێ و مارك سترۆ، كونسولێ گشتییێ ئەمریكا ل هەولێر و هژمارەكا دبلۆماتكارێن ئەمەریكی.
د وێ كۆمبوونێ دا ره‌وشا سیاسییا عێراقێ و ده‌ڤه‌رێ و پەیوەندییێن دناڤبه‌را حكومەتا هەرێما كوردستانێ و حكومەتا فیدڕالییا عێراقێ و پێدڤییا چارەسەركرنا كێشێن دناڤبه‌را وان و بابەتێن مافێن دەستووری و شایستەیێن دارایی یێن هەرێما كوردستانێ هاتنته به‌حس كرن.
هەروه‌سا ڕۆناهی خستە سەر هێرشێن ئەمنی و مەترسییێن سەرهەڵدانا داعشێ ل عێراقێ و ده‌ڤه‌رێ و ته‌كه‌زی ل سه‌ر هەماهەنگییا دناڤبه‌را هەرێما كوردستانێ و حكومەتا عێراقا فیدڕالی و هه‌ڤپەیمانان هاته كرن بۆ به‌رهنگاربوونا هێرشێن تیرۆێر و ئاستەنگێن ئەمنی.
ره‌وشا سیاسییا ناڤخۆیا هەرێما كوردستانێ تەوەره‌كێ دیتر یێ وێ دیدارێ بوو و شاندێ مێهڤان پێزانین بۆ پێشڤەچوونا ژێرخانا هەرێما کوردستانێ و ئارامی و سەقامگیرییا هەرێما كوردستان هەبوون، ته‌كه‌ز ل سه‌ر پێدڤییا هەماهەنگی و ئێكرێزییا دناڤبه‌را لایەنێن سیاسی یێن هەرێما كوردستانێ كرییە.
