وەزارەتا پەتڕۆلا عیراقێ ئامارێن سالا 2023 یێن هنارتنا پەتڕۆلێ بۆ ژدەرڤە ئاشكەراكرن و تێدا دیاركر، سالا بووری عیراقێ زێدەتر ژ ئێك ملیار بەرمیلێن پەتڕۆلێ بۆ ژدەرڤە هنارتینە، كو زێدەتر ژ نەهـ ملیۆن بەرمیلان یێن كەركووكێ و زێدەتری چار ملیۆن بەرمیلان یێن موسڵ بوون.
ل دویڤ ئامارێن کۆمپانییا سۆمۆ ژی، ل ساڵا 2023 عیراقێ ئێك ملیار و 232 ملیۆن و 170 هزار و 294 بەرمیلێن پەتڕۆلێ هنارتینە ژدەرڤە، تێکڕایێ هنارتنا ڕۆژانە یا پەتڕۆلێ د وێ سالێ دا سێ ملیۆن و 375 هزار و 809 بەرمیل بوون.
هەر ل دویڤ وێ ئامارێ، پترین ڕێژا پەتڕۆلا هنارتی ژ زەڤییێن ناڤەڕاست و باشوورێ عیراقێ بوویە كو گەهشتییە ئێك ملیار و 216 ملیۆن و 395 هزار و 689 بەرمیلان، ئانكو 98.7% یا تێکڕایێ پەتڕۆلا د وێ سالێ دا هاتییە هنارتن.
سۆمۆ دیار ژی كریە، ل ساڵا 2023، داهاتێ هنارتنا پەتڕۆلێ یێ عیراقێ 97 ملیار و 522 ملیۆن دۆلار بوو، کو ب بهایێ فەرمی یێ دۆلاری بەرامبەر ب دینارێ عیراقی دبیتە 126 ترلیۆن و 778 ملیار و 600 ملیۆن دینار.
