په‌یڤدارێ سوودانى: هێرشا به‌غدا تیرۆرستییه‌ و دستوویێ هه‌ڤپه‌یماناندایه‌

په‌یڤدارێ فه‌رمانده‌یێ گشتییێ هێزێن چه‌كدارێن عیراقێ دیاركر، ئه‌ڤرۆ فرۆكه‌یه‌كا بێ فرۆكه‌ڤان هێرشى باره‌گایه‌كێ ئه‌منییێ به‌غدا كرییه‌، ئه‌ڤى كارى چ جۆداهى دگه‌ل كریارێن تیرۆرستى نینه‌، هه‌ڤپه‌یمانییا نێڤده‌وله‌تى ژێ به‌رپرسه‌.

یه‌حیا ڕه‌سول په‌یڤدارێ فه‌رمانده‌یێ گشتییێ هێزێن چه‌كدارێن عیراقێ دڕاگه‌هاندنه‌كێدا ئاشكراكر، ل دووڤ زانیارییێن ده‌ستپێكێ، ئه‌ڤ هێرشه‌ بوو ئه‌گه‌رێ كوشتنا فه‌رمانده‌یه‌كێ حه‌شدا شه‌عبى و جێگرێ وى دگه‌ل برینداربوونا شه‌ش كه‌سێن دى.

یه‌حیا ڕه‌سول دبێژیت: به‌رپرسیاره‌تییا ڤێ هێرشێ بۆ سه‌ر لایه‌نه‌كێ ئه‌منییێ عیراقێ د ستوویێ هێزێن هه‌ڤپه‌یمانییا نێڤده‌وله‌تیدایه‌، ئه‌ڤ كاره‌ دێ بیته‌ ئه‌گه‌رێ تێكدانا هه‌موو لێكتێگه‌هشتنێن دناڤبه‌را هێزێن چه‌كدارێن عیراقێ و هێزێن هه‌ڤپه‌یمانییا نێڤده‌وله‌تیدا، ئه‌و ڤێ هێرشێ ب لڤینه‌كا ترسنۆك و ده‌ستدرێژی بۆ سه‌ر عیراقێ دهژمێرن، ژ گیان و ناڤه‌ڕۆكا  وێ هه‌ماهه‌نگییێ ئه‌وا هه‌ڤپه‌یمانییا نێڤده‌وله‌تى ل سه‌ر دروست بووى یا دووره‌.