ئاژانسا خانی:
كارۆخ خۆشناو” سه‌رۆكێ په‌یمانگه‌ها ڤه‌كۆلینێن ئه‌مریكی _كوردی بۆ ئاژانسا خانی دیار كر: ئەڤە چەندین جاران هێرشێن موشەکی دهێنە سەر هەولێرا پایتەختێ هەرێما کوردستانێ، یا رۆن و ئاشکرایە کو ئەو هێرشە ڕاستەوخۆ یان نه‌ڕاستەوخۆ ژلایێ ئیرانێ ڤه دهێنە ئەنجام دان، هێرشا ڤێ جارێ یا ئیرانێ بۆ سەر هەولێرێ ڕاستەوخۆ ژ لایێ سوپایێ پاسدارانڤە هاتییه ئەنجامدان، ب به‌ها‌نه‌یا هه‌بوونا ناڤەندا سیخوڕییا ئیسڕائیلێ، كو ئه‌ڤێ به‌هانه‌یێ چ بنەمایەک بۆ نینه و یا دوورە ژ راستییێ.
هێشتا دبێژیت: د ڤی چارچۆڤەیی دا هێرشا ڤێ جارێ یا ئیرانێ بۆ سەر هەولێرێ، ب مەرەما گەهاندنا کۆمەکا پەیامانە” ژ وان ژی: ئیران بزاڤان دكه‌ت پێگەهێ سەقامگیری و پێکڤەژیانێ ل هەرێما کوردستانێ تێكبده‌ت” پەیاما ئیرانێ بۆ هەرێما کوردستانێ ئه‌وه” هەڤسەنگییا پەیوەندییێن سیاسی و دبلۆماسی تێکبدەت و تایێ ترازییێ د بەرژەوەندییا ئیرانێ دا بشکێنی”.
کارڤەدانەکا نەڕەوا یا ئیرانێیە بەرامبەر هەرێمێ وەکو تۆلڤەکرنا هێرشا ئەمریکا و هەڤپەیمانێن وێ بۆ سەر حوسییێن یەمەنێ
ناڤهاتی گۆت ژی: ئه‌و هێرشه” هنارتنا پەیامەکێیە بۆ (ئیدارا بایدنی) کو شیعە خوینا (موسەوی و سلێمانی و موهەندسی) و قوربانییێن پەقینا (کرمان) ژبیر ناکەن” تێرکرن و ڕازیکرنا جادا شیعییه ب مەرەما بکارئینانا ناڤخۆیی و ڕیکلامکرن و کۆمکرنا دەنگان بۆ هەلبژارتنێن بهێت یێن ئیرانێ و تاقیکرنا (ئیدارا بایدنی) داکو بزانن هەتا چەند دێ بەرگرییێ ژ هەڤپەیمانێن خۆکەت” هه‌روه‌سا فشارەکە بۆ ئەمریكا داکو پشتەڤانییێ ل ئیسرائیلێ نەکەت و شەرێ غەززە رابگریت.
كارۆخ هێشتا دبێژیت: دووبارەبوونا هێرشێن موشەکی دڤێت مە نەچار بکەت داکو هەلویستەکێ وەربگرین بۆ ئەنجامدانا سێ خالێن گرنگ” ئه‌و ژی ئه‌وه: گرنگە هەرێم داخوازێ ژ ئەمریکا بکه‌ت چاوا ب ڕێیا سیستەمێ پاتریۆت بنگەھ و بارەگایێن خۆ دپارێزن وەسا (ئەسمان و ئاخ و خەلکێ) هەرێمێ ژ هێرشێن نەیاران بپارێزن، چونکی سەرەکیترین بەهانە بۆ هێرشکرنا ئەڤان گروپان پێکهاتییە ژ هەبوونا هێزێن ئەمریکا ل هەرێمێ” هه‌روه‌سا گرنگە هەرێم ب ئاشكرایی داخوازێ ژ عێڕاقێ بکەت داکو سەروەرییا هەرێمێ و عێڕاقێ بپارێزیت، ئەگەر عێڕاق نەشێت ڤێ بکەت، گرنگە داخواز بهێتە کرن جڤاتا ئاسایشا نەتەوێن ئێکگرتی ب بڕیارەکا هەڤشێوێ (٦٨٨) ێ هەرێمێ ژ هێرشێن لایەنێن ناڤخۆیی و دەرڤە بپارێزیت” دیسان پێدڤییە سەرکردایەتییا سیاسییا کوردستانێ لەزێ بکەت د پڕۆسا ڕێکخستن و یەکخستنا هێزێن پێشمەرگەیی، ب مەرەما ئامادەباشییێ و بەرسنگگرتنا هەر هێرشەکێ و گەفێن سەربازی و ئەمنی بۆ سەر ئاخ و خەلکێ هەرێما کوردستانێ.
