پارتى: ئارمانجا هێرشان پێشلكرنا قانوونێن نێڤده‌وله‌تى و سه‌ره‌وه‌رییا هه‌رێما كوردستانێ و عیراقێیه‌

مه‌كته‌با سیاسییا پارتى دیموكراتى كوردستان د ڕاگه‌هاندنه‌كێدا ئیدانه‌یا هێرشا شه‌ڤا بوور یا له‌شكه‌رێ پاسدارێن ئیرانێ بۆ سه‌ر هه‌ولێرێ كر و ڕاگه‌هاند، ئارمانج ژ ئه‌ڤێ هێرشا نه‌ڕه‌وا و تاوانكارى تێكدانا سه‌قامگێرییا هه‌رێما كوردستانێ و پێشلكرنا قانوونێن نێڤده‌وله‌تى و سه‌روه‌رییا هه‌رێما كوردستانێ و عیراقێیه‌.

مه‌كته‌یا سیاسییا پارتی د ڕاگه‌هاندنا خوه‌دا دیاركر، ب مخابنییه‌كا مه‌زنڤه‌ جاره‌كا دى كۆمارا ئیسلامییا ئیرانێ ب بهانه‌یێن بێ بنه‌ما و ب ڕێیا ژماره‌یه‌كا مووشه‌كێن بالیستى و درۆنان هێرشى باژێرێ هه‌ولێر یێ پایته‌ختێ هه‌رێما كوردستانێ كر كو زیانێن گیانى یێن مه‌زن ل دووڤ خوه‌ هێلان و بوو ئه‌گه‌رێ شه‌هید و برینداربوونا ژماره‌یه‌كا وه‌لاتییێن سڤیل و ژن و زارۆكێن بێ تاوان، ئارمانج ژ ڤێ هێرشا نه‌ره‌وا و تاوانكرى، تێكدانا سه‌قامگێرییا هه‌رێما كوردستانێ و پێشلكرنا قانوونێن نێڤده‌وله‌تى و سه‌روه‌رییا هه‌رێما كوردستانێ و عیراقێیه‌.

هه‌روه‌سا ئاماژه‌ ب هندێ دا، داخوازێ ژ نه‌ته‌وه‌یێن ئێكگرتى و هه‌موو لایه‌نێن سیاسى دكه‌ت، به‌رامبه‌ر ڤێ ده‌ستدرێژییا كۆمارا ئیسلامییا ئیرانێ ب ڕاوه‌ستن و ڕێكێ ل ڤان جۆره‌ كریارێن نه‌مرۆڤانه‌ و دوور ژ عرفێن جیرانییێ بگرن، ئێدى وه‌لاتییێن سه‌ربلندێن كوردستانێ نه‌بنه‌ ئارمانجێن مووشه‌ك و درۆنێن كۆمارا ئیسلامییا ئیرانێ و چ لایه‌نێن دى.