بابه‌كر زێبارى: جیهان هه‌موو دزانیت ئیرانێ چ ئه‌گه‌ر بۆ هێرشكرنا ل سه‌ر هه‌ولێرێ نه‌بوون

سوپاسالارێ پێشتر یێ عیراقی ڕاگه‌هاند، ئیرانێ چ بهانه‌ بۆ هێرشكرنێ ل سه‌ر هه‌رێما كوردستانێ نه‌بوو، هه‌لویستێن عیراقێ و وه‌لاتێن جیهانى د جهێ خوه‌دابوون.

بابه‌كر زێبارى سوپاسالارێ پێشتر یێ عیراقێ بۆ ئاژانسا خانى دیاركر، هه‌رێما كوردستانێ ده‌ڤه‌ره‌كا هه‌ستیاره‌، ده‌وروبه‌رێن وێ هه‌موو ده‌وله‌تێن تێك شێلاى و نه‌دیموكراتینه‌، هه‌ر وه‌لاته‌كێ ژ وان ژلایێ خوه‌ڤه‌ بزاڤێ دكه‌ت كوردان ژ مافێن وان بێبه‌هر بكه‌ت، جیهان هه‌موو دزانیت ئیرانێ چ بهانه‌ نه‌بوون هێرشى هه‌رێما كوردستانێ بكه‌ت، یا وێ ب تنێ ئه‌وه‌ چاڤێن وێ ب ئارامى و سه‌قامگێرییا  و پێشكه‌ڤتنا هه‌رێما كوردستانێ ڕانابن.

سه‌باره‌ت كارڤه‌دانێن ڤێ هێرشێ ئاماژه‌ ب هندێ دا، سه‌رۆكێ حكومه‌تا هه‌رێما كوردستانێ و سه‌رۆكێ حكومه‌تا عیراقێ ل داڤۆسێ كۆمبوونێن خوه‌ دگه‌ل ئیرانێ هه‌لوه‌شاندن، وه‌لاتێن جیهانى و ئه‌مریكا ژى به‌یاننامه‌ به‌لاڤكرن و ئه‌ڤ هێرشه‌ شه‌رمزاركرن، ئه‌ڤه‌ژى پێنگاڤه‌كا باشه‌، لێ ژبه‌ركو ڕه‌وشا عیراقێ گه‌له‌ك یا ئالوزه‌ و گه‌له‌ك لایه‌نان خوه‌ ب گرۆپێن چه‌كدار پاراستییه‌، چ كه‌سێن خودان بریار تێدا نینن، ئه‌و وه‌سا نابیت كو عیراقێ كارڤه‌دانه‌كا گه‌له‌ك توند به‌رامبه‌ر ڤان هێرشان هه‌بیت