وەزارەتا ساخلەمییا عیراقێ دێ كۆژمێ 10 ملیۆن دیناران دەتە كەسوكارێن وان نۆژدار و كارمەندێن ساخلەمییێ یێن ب ئەگەرێ ڤایرۆسێ كۆڕۆنایێ ژیانا خۆ ژدەستداین، لێ هەرێما كوردستانێ ناڤەگریت.
ڕیاز عەبدولەئەمیر حلفی، ڕێڤەبەرێ گشتی یێ کارگێری و دارایی و یاسایی یێ وەزارەتا ساخلەمییا عیراقێ ئاشكەراكر، وەزارەتا ساخلەمییا عیراقێ ب ڕێیا نڤیسارەكێ كو پێشكێشی نەخۆشخانەیان كریە، داخوازكریە كەسوكارێن وان نۆژدار و كارمەندێن ساخلەمییێ یێن ب ڤایرۆسێ كۆڕۆنایێ ژیانا خۆ ژدەستداین بهێنە ئاگەهداركرن كو سەرەدانا هۆبەیا خانەنشینان ل وەزارەتێ بكەن بۆ تەمامكرنا ڕێكارێن پێدانا 10 ملیۆن دیناران. لێ بڕیار وان كارمەندێن ساخلەمییێ یێن ل هەرێمێ و ژبەر هەمان ئەگەر ژیانا خۆ دەستداین، ناڤەگریت.
جڤاتا وەزیرێن عیراقێ ل سالا 2021 بڕیارا ژمارە 95 تایبەت ب پێدانا 10 ملیۆن دیناران ب کەسوکارێن وان نۆژدار و كارمەندێن ساخلەمییێ یێن ل دەمێ بەلاڤبوونا كۆڕۆنایێ ژیانا خۆ ژدەستداین دەركر كو ل دویڤ داتایێن وەزارەتێ ژمارا وان 214 كەسن.
