رزگار حەمید شەریف
بەری کو بەرسڤا پرسیارا ل سەری بدەین، پێدڤیرە چەندەک پاش ١٥.١.٢٠٢٤ ڤەگەرین و ببینن چ روودان ل دەڤەرێ قەومین:
– ل ٧.١٠.٢٠٢٣ حەماس ب هاریکارییا ئیرانێ ب هێزترین هێرشێ دکەتە سەر ئیسرائیلێ کو د دیرۆکا کێشەیا فەلەستینێدا نموونە نینە و دفنا ئیسرائیلەکا ب هێز و پر تەکنولوجی دشکێنت و زێدەترین رەهینەیان د گەل خوە دبەت.
– ئیرانێ ب ڤێ هێرشا سەر ئیسرائیلێ هەول دا رێگریێ ل چوونا عەرەبستانا سعودیا بکەت کو بچیتە ناڤ پەیمانا ئاشتییا ئەبراهام ناڤبەرا جوهی و دەولەتێن عەرەبا کو چەند رۆژەک ژ ئیمزاکرنێ نێزیک بوون.
– ئیسرائیل وەک پلنگەک بریندار و چاڤشکەستی هێرشی غەزە دکەت و بلندبوونا قوربانییێن سیڤیل و زارۆک دبیتە ئەگەرێ وێ چەندێ سۆزا نێڤدەولەتی بۆ دۆزا فەلەستینیان زێدە ببەت.
– ئەمریکا دژی گرژی و بەلاڤبوونا شەڕییە ل رۆژهەلاتا ناڤین و زێدەترین بزاڤا دیپلۆماسی دکەت کو شەڕ ژ غەزە دەرنەکەڤیت و بەرفرەهتر نەبیت، داکو دیسان پۆستالێن ئەمریکی نەکەڤنە شەڕێن بێ دووماهیک ل دەڤەرێ و هەلبژارتنێن سەرۆکاتییا ئەمریکانە و بایدنی نەڤێت ب شەڕەک نوو شانسێ برنا خوە کێم بکەت و ئیران ژی ڤێ ئێکێ دزانت و سەبرا ئەمریکا تاقیدکەت.
– ئیسرائیلا تووڕە و بریندار دەست ب کوشتنا چەندین بەرپرسێن سوپایێ پاسداران و حزبوللا و حەماسێ ل دەڤەرێ کر و ل سەرسالا کوشتنا قاسم سولەیمانی ٣.١.٢٠٢٤ بومبەیێن چاندی بوویە ئەگەر کوشتنا ب دەهان کەسان و بریندار بوونا کۆمەکا ئیرانیان. ل ١٥-١٢-٢٠٢٣ جەیشا عەدل ل سیستان و بەلوچستان ١١ سەربازێن ئیرانێ کوشتن و چەندین کەس بریندار کرن.
– ئیران کو ترسا هێرشا راستەوخۆ سەر ئەفغانستان و پاکستان و ئیسرائیل و ئەمریکا هەیە ل دەڤەرێ و هەم ژیک پرۆکسیێن وان و کۆمەلگەهێ ئیرانێ چاڤەرێی رەنگڤەدانا ئیرانێ بوو. ژ بەر ڤێ ئێکێ هەرێما کوردستانێ وەک باشترین و نێزیکترین ئارمانج دیتن بۆ تۆلڤەدانێ.
– مالا شەهید پێشرەو دەرڤەی هەولێر و ل سەر رێکا مەسیف و ل تەنیشت کۆنسوخانا ئەمریکایە.
– هێرشا ب موشەکێن بالیستیکی کو کێشا هەر ئێک ١.٣٠٠ کێلۆیە، ئەگەر نە ل مالەکا تنێ ل سەر زەڤیەکا بەرفرەهە وەک شەهید پێشرەو با و ل گەرەکەکا هەولێرێ دا با، دا ب هزاران قوربانی پاشخوەڤە هێلت و ب نێگەتیڤ ل سەر ئیرانێ راوەستت.
– ئەڤ موشەکە، پەیام بوون بۆ ئەمریکا و ئیسرائیلێ کو مە شیان هەنە ل وە بدەن ئەگەر مە بڤێت و ب رێکا ترساندنا هەرێما کوردستانێ وێ پەیامێ دگەهینیت.
– سیناریۆیا پێکڤەگرێدانا بازرگانەک مەزن ب موسادێ و ئیسرائیلێ ژی بۆ ئیرانێ بۆ رایا گشتی یا ئیران و پرۆکسیێن وان ئاسانن و هێرشا هەولێرێ ژی بوویە ئەگەرێ بلند بوونا مۆرالێ پرۆکسیێن ئیرانێ ل دەڤەرێ کو بێژن ئاغایێت مە تولا مە ڤەکرن و شیانێن لێدانا راستەوخۆیا ئەمریکا و ئیسرائیل هەنە.
