ئاژانسا خانی:
ئەندامه‌كێ پەرلەمانێ عێراقێ ژ فراكسیۆنا پارتی دیموکراتی کوردستان دیار كر: چار سكالا ل داگه‌ها فیدرالییا عیراقێ ل سه‌ر روونشتنا 13 ی كانوونا دوویێ 2024 ێ یا په‌رله‌مانێ عیراقێ بۆ یاسایی بوونا وێ روونشتنێ و هنده‌ك به‌ربژاران هاتینه تۆماركرن” هه‌تاكو ئه‌و سكالایه ل دادگه‌هێ نه‌هێنه ئێكلاكرن” سه‌رۆكه‌كێ نوو بۆ په‌رله‌مانێ عیراقێ ناهێته هه‌لبژارتن” هه‌ر چه‌نده نوكه روونشتنا په‌رله‌مانێ عیراقێ یا به‌رده‌وامه و دێ هژماره‌كا یاسایان هێنه گه‌نگه‌شه‌كرن و هه‌مواركرن و دێ ده‌نگدان ل سه‌ر هێته‌دان.
چیایی تەیمور” زێده‌تر بۆ ئاژانسا خانی گۆت: ڤێ جارێ هه‌لویستێ عیراقێ ده‌رباره‌یی هێرشا پاسدارێن ئیرانێ بۆ سه‌ر هه‌ولێرێ گه‌له‌ك یێ باشبوو” هه‌روه‌سا حكومه‌تا عیراقێ بالیۆزێ ئیرانێ ل عیراقێ گازیكر و یاداشتنامه‌كا نه‌رازیبوونێ راده‌ستكر” دیسان حكومه‌تا عیراقێ ل نه‌ته‌وێن ئێكگرتی ژی یاداشتنامه‌كا نه‌رازیبوونێ تۆماركر” به‌لێ حكومه‌تا عیراقێ چ پێنگاڤێن دیتر ناهاڤێژیت” چونكی ئالییێن شیعی هه‌موو دۆستێن ئیرانێ نه” له‌وما ئه‌و زۆلما ئیرانێ ل هه‌ولێرێ ئه‌نجامدایی و ب موشه‌كان هێرش كرییه سه‌ر هه‌ولێرێ و چه‌ندین شه‌هید و بریندار هه‌ین” هه‌ر ئه‌و هێز و لایه‌نه د بێده‌نگ و بێ هه‌لویست بوون” ژبه‌ر هندێ ژی محمه‌د شیاع سوودانی” ب تنێ دو كورسی دناڤا په‌رله‌مانێ عیراقێ دا هه‌نه” ئه‌و نه‌شێت ئه‌ڤا هاتییه كرن پتر ژ وێ چه‌ندێ بكه‌ت.
چیایی هێشتا دبێژیت: ئه‌ڤ ململانێیه دێ هه‌ر هه‌بیت” هندی ئه‌ڤ ئالۆزییه دناڤبه‌را ئیرانێ و وه‌لاتێن زلهێزێن جیهانێ دا هه‌بن” هه‌روه‌سا ڤێ جارێ هه‌لویستێ هێزێن سوننی ژی یێ لاوازبوو” چونكی لایه‌نێن سوننی ژی كه‌فتینه ژێر هه‌ژموونا لایه‌نێن شیعی” دیسان هه‌موو ده‌ڤه‌رێن سوونییان ژی كه‌فتینه ژێر ده‌ستهه‌لاتا حه‌شدا شه‌عبی یا شیعی” ل سه‌ر هندێ ژی را هه‌تا راده‌كێ هه‌لویستێ لایه‌نێن سوننی ژ یێن شیعان باشتربوویه” چونكی ئه‌و مه‌ترسییا ل سه‌ر هه‌رێما كوردستانێ هه‌یی ل سه‌ر لایه‌نێن سوننی ژی هه‌یه” هه‌روه‌سا نوكه کورد و سوننە ل گەل هندێنه كو هێزێن هه‌ڤپەیمانان و ئەمریکا بمیننه ل عێراقێ.
ئه‌و چه‌ند ژی گۆت: محه‌مه‌د شیاع سوودانی ب کریار شیانێن راوەستاندنا هێرشێن درۆنی بۆ سەر هەرێما کوردستانێ و عێراقێ نینن” له‌وما دێ هه‌ر گه‌ف و هێرشێن ئیرانێ و داروده‌سته‌كێن وێ بۆ سه‌ر هه‌رێما كوردستانێ د به‌رده‌وام بن” ب ڤێ چه‌ندێ ژی ئیران وه‌سا دیاردكه‌ت بۆ دۆست و هه‌ڤالبه‌ندێن خۆ كو ئه‌م دشێین به‌رسڤا ئه‌مریكا بده‌ین” له‌وما ژی ئیران هه‌رێما كوردستانێ موشه‌كباران دكه‌ت.
