وەزیرێ بازرگانی: مه‌ بزاڤ كرینه‌ ئه‌ڤ ساله‌ حكومه‌تا عێراقێ هه‌موو گەنمێ جۆتیارێن ھەرێما کوردستانێ وەربگریت

ئاژانسا خانی:

وەزیرێ بازرگانییا حکومەتا ھەرێما کوردستانێ دیار كر: دێ ھەموو بزاڤان كه‌ین ئه‌ڤ ساله‌ حكومه‌تا عیراقێ هه‌موو گەنمێ جۆتیارێن ھەرێما کوردستانێ وەربگریت، بۆ ڤی بابه‌تی ژی ئه‌م دێ سەره‌دانا بەغدا کەین.

کەمال موسلم، زێده‌تر دبێژیت: مه‌ وەکو وەزارەتا بازرگانییا حکومەتا ھەرێما کوردستانێ ھەموو بزاڤ كرینه‌ بۆ هندێ كو ل سالا 2024 ێ عێراقێ هه‌موو گەنمێ جۆتیارێن ھەرێما کوردستانێ وەربگریت، به‌ری دو هه‌یڤان مه‌ كۆمبوونه‌ك ل گه‌ل وه‌زیرێ بازرگانی یێ حکومەتا عێراقێ كرییه‌ و مه‌ داخواز ژێ كرییه‌ ئەڤ ساله‌ هه‌موو گەنمێ جۆتیارێن ھەرێما کوردستانێ وەربگرن، به‌لێ هه‌تا نوكه‌ وان چ بریار ل سه‌ر ڤی بابه‌تی نه‌دایه‌.

ناڤهاتی گۆت ژی: ئه‌م وەکو وەزارەتا بازرگانییا حکومەتا ھەرێما کوردستانێ دێ بەردەوام بین ل گەل بەغدا بۆ هندێ هه‌موو گەنمێ جۆتیارێن هه‌رێما كوردستانێ وەربگرن، مه‌ بڕیار دایە ل ڤان نێزیكان سەره‌دانا بەغدا بکەین و دێ بزاڤان كه‌ین” كو هه‌موو گه‌نمی جۆتیاران بهێته‌ وه‌رگرتن.