پشتی سێ ڕۆژان ژ پشكداربوونا نێچیرڤان بارزانی، د كۆنفرانسێ ئاسایشا میۆنشدا كو تێدا ل گەل هژمارەكا سەركردە و بەرپرسێن بلند یێن وەلاتان كۆمبووی، نیڤرۆ یا ئەڤرۆ دگەل دووماهی هاتنا كۆنفرانسی، سەرۆكێ هەرێما كوردستانێ سەرەدانا خۆ بۆ ئەلمانیا ب دووماهی ئینا.
دلشاد شەهاب، پەیڤدارێ سەرۆكایەتییا هەرێما كوردستانێ د كۆنفرانسەكیدا ڕاگەهاند،” پشكدارییا سەرۆكێ هەرێمێ د كۆنفرانسێ میۆنشدا بۆ گەهاندنا پەیاما هەرێما كوردستانێ بۆ سەركردەیان و كەسانێن ل جیهانێ پشكدارییێ د بڕیاراندا دكەن، گەلەك یا گرنگە “
دلشاد شەهاب دیاركر، بەرەڤ پێشڤەچوونەكا ڕێژەیی د ناڤبەرا هەرێما كوردستانێ و حكومەتا عیراقێ بۆ چارەسەركنا ئاریشەیان هەیە، ب تایبەت پشتی كۆمبوونا نێچیرڤان بارزانی دگەل سەرۆكوەزیرێن عیراقێ ل میۆنشن، ژبەركو باس ل بابەتێ مووچەی، دابینكرنا مافێ وەلاتییێن هەرێمێ و هنارتنا پەتڕۆلا هەرێمێ هاتەكرن.
