ئەڤرۆ ڕۆژا پێنجشەمبی ل سەلاحەددین، سەرۆك مەسعود بارزانی پێشوازی ل ڤاهاگن خاچاتوریان، سەرۆكێ ئەرمینیا كر.
د دیدارێدا سەرۆكێ ئەرمینیا ستایشا پێشكەفتن و ئارامییێ ل هەرێما كوردستانێ كر و ڕۆلێ سەرۆك بارزانی د دابینكرنا ژینگەهەكا ئارام و پێكڤەژیانێ دناڤبەرا پێكهاتەیێن هەرێما كوردستانێ و هەروەسا بەرهنگاربوونا تیرۆر و توندڕەویێ بلند نرخاند.
هەر د كۆمبوونێدا سەرۆك بارزانی ب گەرمی ب خێرهاتنا سەرۆكێ ئەرمینیا كر و ئاماژە ب پەیوەندییێن دیرۆكی دناڤبەرا گەلێ كوردستان و گەلێ ئەرمینیا دا و سوپاسییا سەرۆك و وەلاتێ ئەرمینیا ژی كر بۆ ڕێزگرتن ل مافێن كوردان و ئاكنجییێن وەلاتێ ئەرمینیا، هەردوولایەن ژی ل سەر هندێ د هەڤڕا بوون كو ئاشتی تاكە ڕێكا چارەسەركرنا ئاریشەیێن گەل و دەڤەر و نڤشێ نوی نە.
د دیدارێدا دووپات ل بهێزكرنا پەیوەندییێن بازرگانی یێن دناڤبەرا هەرێما كوردستانێ و وەلاتێ ئەرمینیا دا هاتەكرن.
پەیوەندییێن دناڤبەرا هەرێما كوردستان و عیراقا فیدڕال تەوەرەكێ دی یێ كۆمبوونێ بوون و سەرۆك بارزانی دووپات كر كو پابەندبوون ب دەستووری، تاكە ڕێكا چارەسەرییا ئاریشەیێن دناڤبەرا هەرێما كوردستان و حكومەتا عیراقا فیدڕال دایە.
