ب هەلكەفتا پێنجی و چوارەمین سالڤەگەرا ڕێككەفتنا 11ی ئادارێ، سەرۆك بارزانی پەیامەك بەلاڤكر.
دەقێ پەیاما سەرۆك بارزانی:
بناڤێ خۆدێ مەزن و دلۆڤان ڕێككەفتناما 11ی ئادارێ بەرهەمێ شۆڕەشا ئەیلوولێ ب ڕابەراتییا بارزانییێ نەمر و خەبات و قۆربانیدانا پێشمەرگەی و سەرجەم تەخ و چینێن كوردستانێ بوو ل بەرامبەر ستەم و زۆڕدارییا دەستهەلاتدارێن عیراقێ. بەرهەمێ وێ خەباتا مۆكم بوو كو ل پێناڤی ڤەگەڕاندنا ماف و مسۆگەركرنا دیمۆكراسی و شەراكەت و پێكڤەژیانێ دەستپێكری و حكومەتا وی دەمی یا عیراقێ نەچار كر دانپێدانێ ب پشكەكا مافێن گەلێ مە بكەت. د پێنجی و چوارەمین سالڤەگەرا ڕێككەفتناما 11 ئادارێ دا، دۆپاتییێ ل پەیاما ئاشتیخوازانە یا پێكڤەژیانا گەلێ كوردستانێ دكەین و دۆپات دكەین كو گەلێ كوردستانێ بۆ گەهشتن ب مافێن خۆ قۆربانییەكا بێهەژمار دایە و ب ڕێیا چەسپاندنا دۆزا خۆ یا ڕەوا دێ د خەبات و تێكۆشانا خۆ دا بەردەوام بیت.
