ئەڤرۆ چارشەمبی 3 ی نیسانا 2024 ێ” ل سەلاحەدین، سەرۆك مەسعود بارزانی پێشوازی ل جنین پلاسخارت نوونەرا تایبەیا سكرتێرێ گشتییێ ڕێكخراوا نەتەوێن ئێكگرتی ل عێراقێ كر.
د وێ دیدارێ دا بیروڕا ده‌ربارەیی ره‌وشا سیاسییا عێراقێ و ناڤخۆیا هەرێمێ و هەڵبژارتنێن په‌رلەمانێ هەرێما كوردستانێ به‌حسكرن و جنین پلاسخارتێ زێده‌باری ئاماژەدان ب ڕۆلێ سەرۆك بارزانی و پارتی د پڕۆسا سیاسییا عێراقێ و هەرێما كوردستانێ ئاماژە ب هندێ دا كو ئاگه‌هداری هندێیە كو دو سالە پارتی ئامادەیی برێڤەچوونا هەابژارتنان بوویە د ده‌مێ خۆدا و نوكه د دلگرانییێن پارتی د هه‌مبه‌ر هەڵبژارتنان تێدگەهن و ته‌كه‌زی ل سه‌ر پێدڤییا پشكدارییا پارتی د هەڵبژارتنان دا كرییە و گۆت ئه‌نجامدانا هەڵبژارتنان بێی پارتی دێ پڕۆسەكا ب زەحمەت بیت.
سەرۆك بارزانی هۆكارێن هەلوێستێ پارتی رۆهنكرن و دیار كر: كو دادگەها فیدڕالی جهێ دەستهه‌لاتا یاسادانانێ گرتییە و بڕیارێن وێ د سیاسینه و ب شێوەكێ نینن كو ڕێزێ ل قەوارەیێ هەرێما كوردستانێ بگریت.
سەرۆك بارزانی گۆت ژی” بێبەشكرنا پێكهاتان ژ نوونەرێن وان زیانه‌كا زۆر مه‌زنه ب وێ پێكڤەژیانێ دگەهینیت كو گەلێ كوردستانێ ب دەهان سالە ژ پێخه‌مه‌ت دا خەبات بۆ كرییە، دڤێت مافێن پێكهاتان لبه‌رچاڤ بهێته گرتن، چونكی ئەو ژی نەتەوەیێن جۆدانه و دڤێت ل كوردستانێدا هەست ب هه‌بوونا خۆ بكەن” ئه‌و په‌رلەمانێ نەتەوێن دیتر تێدا نەبن دێ په‌رلەمانه‌كێ لەنگ و نه‌كامل بیت.
سەرۆك بارزانی” ته‌كه‌زی ل سه‌ر پێدڤییا ئه‌نجامدانا هەڵبژارتنان كر، بەلێ هەڵبژارتنه‌ك كو تەعبیرێ ژ ئیرادا گەلێ كوردستانێ بكه‌ت و یا ئازاد و شەفاف بیت و دوور بیت ژ دەستوەردانێن دەرەكی و دیزاینێ پێشوەخت یێ دەرئەنجامان.
سه‌رۆك بارزانی دیار كر ژی” ل هەرێما كوردستانێ پارتی دامەزرێنەرا شەرعییەتێ و هەڵبژارتنان بوویە و وی بخۆ 1991 ێ ل باژێرێ كۆیە ڕاگەهاندییە كو پێدڤییە ل شەرعییەتا شۆڕه‌شگێڕی بەرەف شەرعییەتا یاسایی بچین.
سەرۆك بارزانی ڕۆناهی خستەسەر ره‌وشا عێراقێ و ته‌كه‌زر كر كو ل عێراقێدا ڕێككەفتن دهێنه بنپێكرن، بۆ پێكئینانا حكومەتا نوو یا عێراقێ مه ڕێككەفتن ل گەل لایەنێن سیاسی ل ده‌مێ پێكئینانا ئیئتیلافا ئیدارا دەوڵەتێ هەبوو و هه‌تا نوكه چ ژ وان خالێن وێ ڕێككەفتنێ نه‌هاتینه بحهئینان و ل گەل هندێ بەغدا ب شێوەكێ نه دەستووری دەست بۆ ژیانا خەڵكێ كوردستانێ برییە و مووچە و قووتێ خەڵكێ كوردستانێ وەكو چەكه‌كێ بۆ تێكدانا سەقامگیرییا هەرێمێ و بێزاركرنا خەڵكێ كوردستانێ بكارئیناوە.
سەرۆك بارزانی ب پێدڤی زانی ژ پێخه‌مه‌ت برێڤەچوونا هەڵبژارتنه‌كا پاقژ و شەفافدا كێشێن تەكنیكی بهێنه چارەسەر كرن و لژێر چاڤدێرییا جڤاكێ نێڤدەوڵەتیدا بیت.
نوونەرا تایبەتا سكرتێرێ گشتییێ نەتەوێن ئێكگرتی ل عێراقێ ئەو چه‌نده ب سەرۆك بارزانی ڕاگەهاند” كو كێشا مووچەیی د ڕاپۆرتا خۆدا بۆ جڤاتا ئاساییشێ به‌حس كرییە و نابیت جۆداهی دناڤبه‌را فەرمانبەرێن هەرێما كوردستانێ و عێراقێ دا هەبیت و دێ بزاڤان كه‌ت بابەتێ مووچەیی و شایستەیێن دارایی یێن خەڵكێ كوردستانێ ل گەل حكومەتا عێراقێ به‌حس بكه‌ت” هەروەسا پێشنیار كر بۆ بابەتێ هەڵبژارتنێن هەرێمێ، تیمه‌كێ نەتەوێن ئێكگرتی هاریكار بن بۆ چارەسەركرنا ئەوان كێشێن تەكنیكی یێن كو پارتی تێبینیی ل سەر هەین.
