ئاكرێ ناسناڤێ خۆلا نایابا كوردستانێ ببه‌ت، دێ كۆمه‌كا خه‌لاتێن دارایى وه‌رگریت

یانه‌یا ئاكرێ به‌رامبه‌ر ده‌رفه‌تا تۆماركرنا ده‌ستكه‌ڤته‌كێ دیرۆكییه‌، ده‌مێ دبیته‌ مێڤانا یانه‌یا چوارقۆرنه‌ ژ هه‌ڤركییێن گه‌ڕا 30ێ و دووماهییێ ژ خۆلا نایابا كوردستانێ.
سوهه‌یب عه‌لى به‌رپرسێ ڕاگه‌هاندنا یانه‌یا ئاكرێ بۆ ئاژانسا خانى دیاركر، ئه‌ڤرۆ ئه‌و دێ یارییه‌كا چاره‌نڤیسى كه‌ن، مۆرالا وان بۆ ڤێ یارییێ یا بلنده‌ و ب هیڤینه‌ ناسناڤى بده‌ستڤه‌ببه‌ن، ب تایبه‌ت كو هه‌موو یاریكه‌رێن وان دبه‌رهه‌ڤن و چ یاریكه‌ر ژ ئه‌گه‌رێن هنگاڤتن یان كارتان د دووركه‌ڤتى نابن.
زێده‌تر گوت: پارێزگارێ دهۆكێ د. عه‌لى ته‌ته‌رى سۆزدایه‌ وان، ئه‌گه‌ر ئاكرێ شیا ناسناڤى بده‌ستڤه‌ببه‌ت، خه‌لاته‌كێ دارایى یێ باش پێشكێشى یانه‌یێ بكه‌ت، هه‌روه‌سا ژماره‌كا كه‌سایه‌تى و سه‌رمایه‌دارێن ئاكرێ ژى سوزدایه‌ وان، ب هه‌لكه‌ڤتا برنا ناسناڤێ خۆلێ، خه‌لاتێن دارایى پێشكێشى یانه‌یێ بكه‌ن.
ئاكرێ ب 49 خالان سه‌ركێشییا خۆلێ دكه‌ت، ب جۆداهییا خاله‌كێ پێشمه‌رگه‌ى هه‌ولێر ل ڕێزا دووێ دهێت و شێروانه‌ ب 47 خالان خۆدانا ڕێزا سێیێ یه‌، ئه‌گه‌ر ئاكرێ سه‌ركه‌ڤتن دڤێ گه‌ڕێدا تۆماركر، بێى ته‌ماشه‌كرنا ئه‌نجامێن هه‌ڤركێن خوه‌، دێ ناسناڤى ب ده‌ستڤه‌به‌ت، دبه‌رامبه‌ردا ئه‌گه‌ر تووشى دۆڕاندنێ بوو، دڤێت یارییا شێروانه‌ و مێڤانا وێ پێشمه‌رگه‌ى هه‌ولێرێ ب وه‌كهه‌ڤى ب دووماهى بهێت، داكو ناسناڤى مسوگه‌ر بكه‌ت.