د گەرمییا ڕەوشا گوهوڕینێن سەقایی دا ل عیراقێ و داكەفتنا ئاستێ ئاڤا هەردوو ڕویبارێن دیجلە و فۆڕات، عیراقێ دڤێت ب ڕێیا سەرەدانا سەرۆككۆمارێ توركیا بۆ بەغدا چارەسەرییەكا ڕاستەقینە بۆ قەیرانا ئاڤێ بكەت كو دەڤەرێن چاندنێ ڤەگرتینە.
خالد شەمال، پەیڤدارێ وەزارەتا ژێدەرێن ئاڤێ یا عیراقێ ڕاگەهاند، چەندین جاران سەرۆكوەزیران ڕاگەهاندیە، دۆسەیا ئاڤێ ژ كارێن پێشینە یێن حكومەتێ یە و هیچ دۆسەیەك ناهێتە گوتوبێژكرن هەتا گەرەنتیكرنا ئاڤا عیراقێ تێدا نەبیت. چەندین دۆسە هاتینە ئامادەکرن ژبۆ كو بێخنە سەر مێزا گوتوبێژان ل گەل توركیا، گرنگترینا وان دۆسەیا ئاڤێ یە، حکومەتا عیراقێ دڤێت ب ڕێیا ڕێكەفتنێن پێشتر یێ دناڤبەرا وان دا پشكەكا دادوەرانە یا ئاڤێ ژ توركیا پێ بهێتەدان.
فادى شەمەرى، شیرەتكارێ سەرۆکوەزیرێن عیراقێ ژی ڕاگەهاند، ” ب پشتڕاستیڤە دۆسەیا سیاسى و پەرەسەندنێن دەڤەرێ و دۆسیەیا ئاڤێ ژ گرنگترین دۆسەیانە بۆ وێ کۆمبوونێ، ب بوچوونا مە عیراق و تورکیا دێ ل سەر ڕێككەڤن، دۆسیەیێن دی یێن هەستیار و ئالۆز ژی هەنە ژ ڕوویێ ئەمنی ڤە كو دێ هێنە گوتوبێژكرن، ژوان دۆسەیا سنووری. “
