ڤه‌كۆلینه‌ك: سپۆر شیانێن مه‌ژى بهێز دكه‌ت

ڤه‌كۆلینه‌كا نوو ل ئه‌مریكا ئاشكراكر، سپۆر مه‌ژى پاقژ دكه‌ت و هاریكارییا پاراستنا ساخله‌مییا دلى و ته‌پكێن خوینێ دكه‌ت.

ڤه‌كۆلین ل نه‌خۆشخانه‌یا ماساچۆسێتس ل ئه‌مریكا هاته‌ كرن و ده‌ركه‌ڤت، كو كارتێكرنێ ل سه‌ر شیانێن مه‌ژى دكه‌ت.

د. ئه‌حمه‌د ته‌وه‌كول سه‌رپه‌رشتێ ڤه‌كۆلینێ دبێژیت: سپۆر ساخله‌مییا دلى د پارێزیت و ڕێگرییێ ل تووشبوون ب جه‌لته‌یا دلى دكه‌ت، هه‌روه‌سا تووشبوون ب خه‌موكییێ ژى كێم دكه‌ت.

ئاماژه‌ ب هندێ ژى دا، پێدڤییه‌ نۆشدار په‌یوه‌ندییا دناڤبه‌را دلى و مه‌ژیدا بۆ نه‌خۆشان ڕوونبكه‌ن و ل سه‌ر مفایێن چالاكییا له‌شى ئاگه‌هداربكه‌ن.

بسپۆر دبێژن: چالاكییا له‌شى ب ڕێژه‌یه‌كا به‌رچاڤ فشارێن ده‌روونى كێمدكه‌ت و ڕێگرییێ ل خه‌موكییێ، دوولى و لاوازبوونا شیانێن بریاردانێ دكه‌ت.